Rusiyanın xarici işlər naziri Sergey Lavrovun ötən gün BMT Təhlükəsizlik Şurasının 79-cu sessiyasında İsrail və “Hizbullah” qruplaşmasına çağırışı müzakirələrə səbəb olub.

XİN başçısı bildirib ki, İsrail bütün hücum hərbi əməliyyatlarını dayandırmalı, silahlı qüvvələrini Livanın cənubundan çıxarmalıdır. O həmçinin “Hizbullah”ın öhdəliklərini əks etdirən Təhlükəsizlik Şurasının 1701 saylı qətnaməsinin tam və hərtərəfli yerinə yetirilməli olduğunu bildirib. Lavrov Rusiyanın hər iki tərəfi əməliyyatları dayandırmağa çağırdığını və münaqişənin sülh yolu ilə həll edilməli olduğunu deyib.

Moskva rəsmisinin çağırışından qısa müddət sonra “Hizbullah” liderinin ölüm xəbərinin yayılması diqqət çəkib.

Rusiyanın İsraillə bağlı sərt mövqeyinin səbəbi nədir? Mövcud gərgin vəziyyətdə Bakının yanaşması necə olacaq?

Globalinfo.az-a danışan siyasi şərhçi Kənan Novruzov deyib ki, Rusiya- İsrail münasibətlərinin gedişatı hər kəsə məlumdur:

“Bu, həm də Rusiya – ABŞ əlaqələri kontekstindən qiymətləndirilməli mövzudur. Məsələn, əgər Moskva ilə Vaşinqton arasında gərginlik azalsa, bu, Təl-Əvivlə münasibətlərə də təsir edəcək. Yəni hazırkı situasiyada Rusiya rəsmilərinin İsrailə qarşı belə tənqidi fikirlər səsləndirməsi təəccüblü deyil.

Perspektivdə müharibə genişlənə bilər. Bu, digər ölkələrin, o cümlədən Rusiyanın konkret addım atması ilə nəticələnəcək. Rusiya və Türkiyə mövcud vəziyyətdə koordinasiyalı davranacaq. Azərbaycan üçün situasiya çətin olsa da, tədricən mövqeyini dəyişə, Ankara və Moskvanın ritorikasına uyğun yanaşma ortaya qoya bilər”.

Turan Rzayev
Globalinfo.az