Azərbaycanın vitse-prezidenti, Heydər Əliyev Fondunun prezidenti Mehriban Əliyeva ölkəmizin dövlətçiliyinin möhkəmləndirilməsində, mədəni irsimizin qorunub yaşadılmasında və dünya miqyasında tanıdılmasında misilsiz xidmətlər göstərmiş şəxsiyyətlərdəndir. Onun fəaliyyəti həm dövlətçilik prinsiplərinə bağlılıq, həm də xalqın milli-mənəvi dəyərlərinə sonsuz hörmət və sədaqət nümunəsidir.
Mehriban xanım Əliyeva Azərbaycanın ictimai-siyasi həyatında xüsusi yer tutmaqla yanaşı, mədəniyyətimizin inkişafında da böyük rol oynamışdır. O, Heydər Əliyev Fondu vasitəsilə həyata keçirdiyi layihələrlə milli musiqimizin, xüsusən də muğam sənətimizin beynəlxalq aləmdə tanıdılması və qorunub gələcək nəsillərə ötürülməsi üçün böyük zəhmət sərf etmişdir. Məhz onun təşəbbüsü və dəstəyi ilə muğam sənəti 2008-ci ildə UNESCO-nun Bəşəriyyətin Qeyri-Maddi Mədəni İrs Siyahısına daxil edilmişdir. Bu, Azərbaycanın zəngin mədəniyyətinə verilən ən yüksək beynəlxalq qiymətlərdən biri olmuşdur.
Mehriban Əliyevanın Azərbaycanın UNESCO-da xoşməramlı səfiri kimi fəaliyyəti də ölkəmizin beynəlxalq mədəni platformalarda daha tanınmasına və hörmət qazanmasına xidmət edir. Onun təşəbbüsü ilə bir sıra beynəlxalq tədbirlər keçirilmiş, dünya ictimaiyyətinə Azərbaycanın qədim musiqi irsi, mədəni abidələri və humanitar dəyərləri təqdim olunmuşdur. O, Azərbaycanın mədəni irsinin yalnız ölkə daxilində deyil, həm də beynəlxalq aləmdə qorunmasına və təbliğinə xüsusi diqqət yetirir.
Mehriban xanım Əliyeva həm də xalqımıza, onun rifahına və gələcəyinə xidmət edən çoxsaylı sosial və humanitar layihələrin müəllifidir. Təhsil, səhiyyə, idman və mədəniyyət sahələrində reallaşdırılan bu təşəbbüslər yüz minlərlə insanın həyatına müsbət təsir göstərmiş, xalqın ona olan etimad və sevgisini daha da artırmışdır. O, daim göstərir ki, mədəniyyətin yaşadılması yalnız maddi sərmayə ilə deyil, böyük sevgi, vətənpərvərlik və xalqına sonsuz bağlılıqla mümkündür.
Bugünkü Azərbaycan həm modern inkişaf yolunu seçən, həm də köklərinə sadiq qalan bir dövlətdir. Bu vəhdətin qorunmasında və gələcək nəsillərə ötürülməsində Mehriban Əliyeva kimi dövlət xadimlərinin rolu əvəzsizdir. Onun fəaliyyəti sübut edir ki, dövlətə, mədəniyyətə və xalqa ürəkdən xidmət edənlər zamanın sınağından alnıaçıq və başıuca çıxırlar.
Sevinc Salehqızı
"AYMEDİACOMPANY.AZ" bölgə müxbiri
