Azərbaycanın müdafiə naziri general-polkovnik Zakir Həsənov Minskdə belaruslu həmkarı general-leytenant Viktor Xrenin ilə danışıqlar aparıb.

Bu barədə “Report” Belarus müdafiə nazirliyinin mətbuat xidmətinə istinadən xəbər verir.

Məlumata görə, danışıqlar zamanı tərəflər ikitərəfli hərbi əməkdaşlığın cari vəziyyətini müzakirə edib. Qarşılıqlı maraq doğuran sahələrdə onun intensivləşdirilməsi yollarını müəyyənləşdiriblər.

Z.Həsənov qeyd edib ki, Azərbaycan Belarus ilə hərbi və hərbi-texniki əməkdaşlığı yüksək qiymətləndirir: "Nümayəndə heyətlərinin mübadiləsi təkcə təcrübə mübadiləsi deyil, həm də ölkələrimizin yaxınlaşmasıdır".

Belarusun müdafiə naziri öz növbəsində vurğulayıb ki, Azərbaycanla əməkdaşlıq yüksək etimad səviyyəsi ilə fərqlənir: "Belarus və Azərbaycan arasında əməkdaşlıq açıq xarakter daşıyır və yüksək səviyyəli çoxtərəfli dialoq ilə fərqlənir. Bunun ən yaxşı təsdiqi iki ölkənin prezidentləri Aleksandr Lukaşenko və İlham Əliyev arasında dostluq və etimad münasibətləridir. Bir daha hərbi sahədə ikitərəfli münasibətlərimizin yüksək səviyyəsini, ən əsası isə onların daha da dərinləşdirilməsi üçün qarşılıqlı maraq və potensialın mövcudluğunu vurğulamaq istəyirəm".