Rusiyanın Xarici Kəşfiyyat Xidmətinin (XKX) direktoru Sergey Narışkinin Azərbaycana səfəri hələ də müzakirə edilir. Bakıda olarkən onun dilindən səslənən “Rusiya və Azərbaycan sistemdənkənar müxalifət və terror təşkilatlarına qarşı birgə mübarizə aparacaqlar” sözləri diqqət çəkib.

Narışkinin açıqladığı “sistemdənkənar müxalifət və beynəlxalq terrorçu təşkilatlar” ifadəsini ABŞ agenturasının Azərbaycan və Rusiyada inqilab hazırlaması kimi dəyərləndirmək olarmı?

Globalinfo.az-a danışan politoloq Zeynal Əmrəliyev deyib ki, Azərbaycan uzun müddətdir beynəlxalq terrorizmdən əziyyət çəkirdi:

“Azərbaycan beynəlxalq terrorizmə qarşı fəal mübarizə aparan ölkələrdən biridir. 11 sentyabr hadisələrini müsəlman aləmi içərisində qınayan ilk ölkə olub. Ölkəmizin beynəlxalq terrorizm müstəvisində dünyanın müxtəlif ərazilərində apardığı mübarizə təqdirəlayiqdir. Rusiya da terrorizmlə mübarizədə peşəkarlaşmış ölkədir. Müxtəlif dərəcədə bununla bağlı mübarizə aparıb”.

Politoloqun sözlərinə görə, Azərbaycan və Rusiya arasında yüksək əməkdaşlıq münasibətləri var:

“Sərhəd bölgələrində iki ölkə mühüm əməliyyatlar keçiriblər. Sergey Narışkinin Azərbaycana səfəri və burada səsləndirdiyi fikirləri də prosesin tərkib hissəsi kimi dəyərləndirə bilərik. Azərbaycan və Rusiya bundan sonra da beynəlxalq terrorizmə, sistemdənkənar müxalifət adlandırılan, xarici dövlətlər tərəfindən maliyyələşdirilən, təxribatlara sövq edilən qruplara qarşı birlikdə mübarizə aparacaqlarını bildirdi. Bundan sonra da əməkdaşlığın davam etdiriləcəyinə diqqət çəkildi. Bu əməkdaşlıq müsbət dəyərləndirilməlidir”.

Safura Bənnayeva
Globalinfo.az