Azərbaycan Respublikasının Silahlı Qüvvələri tərəfindən 19-20 sentyabr 2023-cü il tarixində həyata keçirilmiş uğurlu lokal antiterror tədbirləri nəticəsində şəhid olmuş Tural Cahangirov Qələmhüseyn oğlu 1 iyul 1991-ci ildə Yardımlı rayonunun Şıxlar kəndində anadan olub. 1997-ci ildə Yardımlı Şıxlar kənd orta məktəbinə qəbul olan şəhidimiz 2003-cü ildən ailəsi ilə birgə Bakının Pirallahı qəsəbəsinə köçüb, elə orta təhsilini Pirallahı rayonu 168 nömrəli tam orta məktəbdə davam edib. 2011-ci ildə orta məktəbi bitirir. 2012-ci ildə hərbi xidmətə yollanır və Kəşfiyyat manqa kamandiri kimi yüksək səviyyədə orduda xidmət edir. Xidmət dövründəki üstün hərbçi zəkası, bacarığı, qabiliyyəti, hərbçi kimi komandirlərin əmr və tapşırıqlarını qeyri-şərtsiz yerinə yetirməsi Turalımızın komandanlıq qarşısında böyük nüfuza sahib olmasına səbəb olur. Müddətli hərbi xidmət dövründə dəfələrlə hərbi rəhbərlik tərəfindən ailəsinə təşəkkür məktubu gəlir və bir neçə fəxri fərman, diplomlarla təltif olunur. Turalımız daha sonra 2013-cü ildə hərbi xidməti başa vuraraq Pirallahıya gəlir və burada zavodların birində operator vəzifəsində çalışır. 2015-ci ildə ailə həyatı qurur bu izdivacdan Turalımızın Fərid və Fatimə adında iki övladı dünyaya gəlir. Turalımız 2020-ci ildə vətən müharibəsində könüllü müharibəyə qatılmaq istəsə də, müharibəyə aparılmır. Daha sonra 2021-ci ilin yanvar ayında Turalımızın vətənpərvərliyi onu MAHHXQ kimi Müdafiə nazirliyinin nəzdində yerləşən hərbi xidmət kursuna getməyə vadar edir. Kursu müvəffəqiyyət və yüksək göstəriciliklə başa vuran Tural Qarabağda Laçın şəhərində yerləşən N saylı hərbi hissəyə xidmətə qəbul olunmuşdur. Daha sonra Azərbaycan Ordusunun Təlim və Tədris Mərkəzində 17 Fevral 2022-ci il tarixdən həmin ilin may ayının 6-sı tarixədək Fəaliyyət göstərən “Kəşfiyyat tağım komandirinin müavini ixtisası” kursunu bitirir və Gizirlik hərbi rütbəsi alır. 2022-ci ilin Sentyabr döyüşlərində iştirak edərək böyük qəhrəmanlıq göstərir. Döyüş zamanı 4 gün ac-susuz neytral zonada qalır və 11 nəfər heyyətlə geri qayıtmağı bacarır. Buna görə Tural Ali Baş Komandan tərəfindən “Vətən uğrunda” medalı ilə təltif olunur. Sentyabr müharibəsindən sonra igidimiz 20.11.2022-ci ildən 28.01.2023-cü il tarixədək fəaliyyət göstərən “Gizirlərin Zabit Vəzifələrinə Hazırlığı Kursu”nu yüksək göstəricilərlə motoatıcı ixtisası üzrə bitirmişdir. Daha sonra 2023-cü ilin 6 Fevral tarixində Müdafiə nazirliyinin müvafiq əmrinə əsasən “Kiçik leytenant” hərbi rütbəsi” alan Turalımız xidmətini Laçın şəhərində davam elətdirir və Respublika Baş Prokurorluğu tərəfindən hədiyyə ilə təltif olunur. Azərbaycan Respublikasının Silahlı Qüvvələri tərəfindən 19-20 sentyabr 2023-cü il tarixində həyata keçirilmiş uğurlu lokal antiterror tədbirləri nəticəsində Ağdərə-Xankəndi istiqamətində qızı Fatimənin doğum günü, həm orta məktəbə getdiyi günü 19 sentyabr günü şəhadətə ucalır. Şəhidimiz şəhadətindən sonra “3-cü dərəcəli rəşadət ordeni”, “İgidliyə görə medal”la təltif olunub.
Həyat yoldaşı İlahə xanımın dediklərindən:
--*_"Turaldan nə qədər danışsam az olar. Çalışacam fikirlərimi qısa ifadə edim... Fikirləşirdimki Tural şəhid olmasa belə, cənnətlikdir. Nəyə görə --çox gözəl qəlbi, düşüncələri, heç kimə qarşı pis düşüncəsi olmazdı... Ailəcanlı, qohumcanlı, dostlarına, tanışlarına, ətrafına mehriban idi. Uşaqları necə çox istəyirdi... Ata sevgisini yanlarında olmasa belə, o qədər gözəl hiss etdirib... Gələndə çox yorğun olurdu... hərdən 5 günlük istirahət götürüb gəlirdi, bir dəqiqə belə dincəlmədən uşaqlarla oynayırdı... Deyirdim ay Tural, uzan dincəl, istirahət elə, ancaq bütün vaxtını uşaqlara ayırırdı... O mənə qarşı da pis olmayıb (ağlayır). Heç vaxt dalaşmamışıq. Bəlkə də başqa ailələrdə söz-söhbət olar, amma bizim ailədə heç bir söz-söhbət olmayıb...(ağlayır danışa bilmir...)
İşində də çox məsuliyyətli biri idi, əsgərlərinə qarşı da... Elə olurdu ki, saat 10-da zəng vururdu ki, "İlahə, uşaqları yatızdırmısan?!" Deyirəm yox... Deyirdi ki, "mən artıq balalarımı yatızdırmışam (əsgərlərini nəzərdə tutur) sən hələ iki uşağı yatızdıra bilməmisən?!" - deyib gülürdü. Əsgərlərinin qayğısına qalırdı...
(göz yaşlarını silir və danışmağa davam edir).
İşində çox peşəkar olub. Çox arzuları vardı, Fatimə 1-ci sinifə gedirdi, deyirdi gəlib özüm aparacam, ancaq qismət olmadı... (ağlayır, danışa bilmir).
Mən də dedim ki, tələsmə, gəlib ad günündə apararsan. Dedi, yaxşı.
Hər dəfə gələndə sürpriz edirdi... demirdi, bir də gördün gecənin bir yarısı zəng vurub. Onun yolu çox uzaq olurdu, 12-15 saat yol gəlirdi, gecə saat 2-3 də çatırdı. Zəng edirdi ki, aç qapını, qapıdayam. Hətta sizə bir söz deyim, neçə km yol gəlirdi, gecə mənə qıymadığı üçün süfrə açmağa qoymurdu - səhər yeyərəm- deyirdi. Deyirdi hər şeyin ən yaxşısını sizin üçün edəcəm. Bir sözümüzü heç vaxt iki eləməzdi. Uşaqlar nə istəyirsə o olsun, heç bir uşaqdan geri qalmasınlar... qismət olmadı... (ağlayır).
İndi də çalışıram onun istədiyi kimi olsun hər şey. O necə istəyirdi elə olsun. Mən arada fikirləşirəm ki, insanın anası, atası, qardaşı, olmayanda yetim olur. Yox, Tural gedəndən özümü o qədər yetim kimi hiss edirəm ki... (dərindən ahh çəkir). Arada mənə elə gəlir ki, Turalın sevgisini uşaqlar böyüyəndə unudacaqlar... bəlkə də unutmayacaqlar, amma istəmərəm unutsunlar... Turalın uşaqlarına sevgisi tam başqa olub...bircə ona pis oluram ki, uşaqlarımız o sevgidən məhrum olublar(ağlayır özünü toparlayıb davam edir).
İnanırsınız, insan bütün dərdin-sərin danışır həyat yoldaşına, ya anaya, ataya, ya da rəfiqəyə, mənim hər şeyim Tural olub. Hər şeyi onunla bölüşmüşəm... İndi məzarı üstünə gedirəm, heçnə danışa bilmirəm. Bu qədər vaxt keçib üstündən, o qədər çətin gəlir ki, İnsanın dərd ortağının getməsi... o qədər istəyirdi evinə tez köçsün, tələsirdi ki, tez köçüm rahat yaşayaq, ancaq alınmadı, qismət olmadı…."(danışa bilmir, göz yaşları içində boğulur...).
Ruhun şad olsun, İgid!
Fərid Əmiraslanov
"AYMEDİACOMPANY.AZ"
