8 Noyabr – Zəfər Günü münasibətilə İkinci Fəxri Xiyabanda anım ziyarətləri keçirilib. Səhər saatlarından etibarən məktəblilər, müəllimlər, şəhid ailələrinin üzvləri və çoxsaylı vətəndaşlar Vətən uğrunda canlarından keçmiş qəhrəmanlarımızın məzarlarını ziyarət etmək üçün xiyabana gəliblər.
Ziyarət zamanı şəhid məzarları önünə gül dəstələri düzülüb, qəhrəmanlarımızın əziz xatirəsi ehtiramla yad edilib. Xiyabanda müşahidə olunan mənzərə bir daha göstərib ki, xalqımız şəhidlərini unutmur, onların göstərdiyi fədakarlığı daim yüksək qiymətləndirir.
AYMEDIACOMPANY.AZ xəbər portalının xüsusi müxbiri Fəxri Nəsirli olaraq mən də ərazidə olmuş, keçirilən anım ziyarətini lentə almışam.
Çəkiliş zamanı xiyabana gələn məktəb şagirdləri ilə görüşərək onlardan müsahibələr almışam. Şagirdlər şəhidlərimizin qəhrəmanlıq yolu, Vətən sevgisi və 44 günlük Vətən müharibəsində qazanılan tarixi Zəfər haqqında fikirlərini bölüşüblər. Onların çıxışlarında şəhidlərə ehtiram, doğma Vətənə bağlılıq və qəhrəmanlarımızın xatirəsini yaşatmaq istəyi xüsusi diqqət çəkib.
Bununla yanaşı, xiyabanı ziyarət edən yaşlı nəslin nümayəndələri və digər vətəndaşlarla da söhbətlər aparılıb. Onlar şəhidlərimizin xalqımızın yaddaşında əbədi yaşayacağını, gənc nəslin bu qəhrəmanlıq tarixini bilməsinin və gələcək nəsillərə çatdırmasının vacibliyini vurğulayıblar.
Reportaj çərçivəsində Azərbaycanın Milli Qəhrəmanı, general-mayor Polad Həşimovun məzarı da ziyarət olunub. Onun məzarı önündə aparılan çəkilişlər zamanı ziyarətçilərlə müsahibələr keçirilib, qəhrəman generalın həyat yolu, Vətənə sədaqəti və Azərbaycan xalqının yaddaşında qoyduğu iz barədə fikirlər lentə alınıb.
Müsahibələrdə səsləndirilən fikirlər bir daha təsdiqləyib ki, şəhidlərimizin qəhrəmanlığı yalnız keçmişimizin deyil, həm də gələcəyimizin mənəvi dayağıdır. Onların uğrunda canlarından keçdikləri Vətən bu gün azad və qalib Azərbaycan kimi yaşayır.
Hazırladığımız reportajın məqsədi Zəfər Gününün mahiyyətini, xalqımızın şəhidlərimizə olan ehtiramını və gənc nəslin qəhrəmanlıq tariximizə münasibətini ictimaiyyətə çatdırmaqdır.
Şəhidlərimizin qanı ilə yazılan Zəfər tariximiz heç vaxt unudulmayacaq!
Allah bütün şəhidlərimizə rəhmət eləsin!
Fəxri Nəsirli
AYMEDIACOMPANY.AZ – xüsusi müxbir
