Keçən 50 ilə "ekskursiya" edəndə onun içində 20 yaş ömrü olan, daima gənc olaraq xatırlanan gülərüz, sevincli və mehriban Həmzə görsənir...
50 İL - HƏMZƏ AD GÜNÜN MÜBARƏK...
Nə qədər illər keçsə də sən 20 yaşındasan ...
Şəhid Adıyev Həmzə Qardaşxan oglu 23 iyun 1974 cü ildə Qubadlı rayonunun Dondarlı kəndində anadan olmuşdur.
Həmzə 1981 ci ildə doğulduğu Dondarlı kəndində məktəbə gedib, 1991-ci ildə doğma kəndindəki orta məktəbi bitirib, Neft və Kimya İnstitutunun Sumqayıt filialına qəbul olmuşdur. Orta məktəbdə oxuduğu illərdə Milli Qəhrəman Əliyar Əliyevin müəllimliyi altında idmanla məşğul olur, bir çox yarışlarda iştirak edib. Respublıka birinciliyində 5 dəfə birinci, 4 dəfə ikinci yeri tutmuşdur.
1990-ci ildə Belarusiyada keçirilən güləş üzrə Ümumittifaq yarışında ən yüksək pilləyə qalxaraq, birinci dərəcəli diploma layiq görülmüşdür.
Qarabağ hadisələri başlananda oxuduğu Ali məktəbdə təhsilini yarımçıq saxlayaraq torpaqlarımızın müdafiəsinə qoşulmuşdu... Doğma Qubadlının sərhəd kəndlərinin qorunmasından başladı döyüş yolu Həmzənin. Qubadlı, Laçın və Zəngilanın sərhəd kəndlərinə ermənilərin hücumlarının dəf edilməsi döyüşlərində fədakarlıqla vuruşmuşdu. 1992-1993-cü illərdə Zəngilan, Cəbrayıl, Laçın və Ağdam rayonlarında gedən qanlı, qeyri- bərabər döyüşlərdə fəal iştirak etmiş, xeyli sayda ermənilərin hərbi texnikalarını, canlı qüvvələrini məhv etmişdir. Son döyüşü 1994-cü ilin yanvar ayının 6-da Ağdamın Güllücə kəndində olmuşdur. Güllücə kəndi uğrunda gedən ağır döyüşdə Həmzə igidliklə vuruşaraq şəhidlik zirvəsinə ucalmışdır.
Həmzə yeddi bacıdan sonra dünyaya gəlmişdi, ona görə də ailədə, qohum-qonşu və kənddə hər kəs onu sevir və xüsusi qayğı ilə yanaşırdı. Bu diqqət və qayğılarla böyüyən Həmzə nəinki ərköyün və nadinc böyüdü, tam əksinə, diqqətcil, özündən böyüklərlə nəzakətlə davranan bir oğul oldu...
Həmzə qısa və şərəfli ömür yaşadı...
Həmzə qohumum olmaqla bərabər, həmdə qonsumuz olub, bir məhlədə kecib uşaqlığımız, gəncliyimiz. Həmzənin döyüş yolundan çox yazıb, çox danışmışıq, bir azda mənə bəlli olan onun şəxsi keyfiyyətindən bir neçəsini yazmaq istəyirəm. Həmzə həddindən artıq şən, şən olduğu qədər də ciddi və istiqanlı idi, tez ünsüyyət qurmağı bacaran, böyük, kiçik yerin bilən çox zarafatçıl cəsur oğul idi. Taleh elə gətirmişdi ki, Həmzə İnstituta da Sumqayıtda qəbul olmuşdu həm də burada tez-tez görüşüb söhbətləşərdik. 1993 -cü ilin sonları Həmzə qısa müddətli məzuniyyətə gəlmişdi. Sumqayıtda fəvvarələr deyilən yerde görüşdük (üçüncü mikrorayonla ikinci mikrorayonun kəsişməsində, Bilik mağazası deyilən yerin qarşısında). Bir az ayaq üstü söhbətləşdik, təzə kostyum geyinmişdi (səliqəli və təzə paltarlar geyinməyi çox sevirdi). Zarafatla dedim, "nədi, yenə bəzənmisən təzə bəy kimi". Gülə- gülə dedi ki, "1-2 günə qayıdacam döyüş bölgəsinə, birdən başıma bir iş gələr, qoy təzə qalmasın kostyumum". Dediyi kimi də oldu, bir neçə gündən sonra heç ağlıma gəlməyən xəbər eşitdim...
Həmzə şəhidlik zirvəsinə ucaldı...
Şəhid ruhuna salam olsun, şəhadətdəki yubleyin mübarəkdir, Həmzə.
Qanınız yerdə qalmadı, Uca Şəhidlər!
Rövşən Murad
