Azərbaycan polisi

İyulun 2-də Azərbaycan Polisi yaranmasının 106-ci ildönümünü qeyd edir. Heydər Əliyevin 1998-ci ildə imzaladığı Fərmanla iyulun 2-si Azərbaycan Polisi Günü elan olunub. Daxili İşlər Nazirliyi 1918-1920-ci illərdə Azərbaycan Demokratik Cümhuriyyətinin yaranmasıyla təməli qoyulub. Cümhuriyyətin süqutundan sonra 70 il sovet dönəmində “milis” kimi fəaliyyət göstərib və inkişaf edib.1988-ci ildə Ermənistanın Azərbaycana qarşı hərbi təcavüzünü ilk olaraq qəhrəmanlıqla nizami qüvvə milis dəf edib, sonrakı illərdə “milis” qüvvələri Daxili Qoşun hissələri oldu. Bu döyüşlərdə 1695 polis əməkdaşı və hərbi qulluqçu şəhidlik zirvəsinə ucaldı, 1710 nəfər isə yaralandı. Göstərdikləri şücaət və igidliklərə görə 67 nəfər Azərbaycanın Milli Qəhrəmanı adına, 1143 nəfər orden və medallara layiq görülüb. Hal-hazırda Azərbaycan polisi Daxili İşlər Nazirliyinin strukturuna daxil olan Azərbaycan Respublikası hüquq mühafizə orqanı kimi xalqa yüksək xidmət göstərir. Azərbaycan Respublikasının polis orqanlarının xarici ölkələrin polis orqanları və beynəlxalq polis təşkilatları ilə əməkdaşlığı, Azərbaycan Respublikasının tərəfdar çıxdığı beynəlxalq müqavilələr vasitəsi ilə cinayətkarlıq və qanuna zidd əməllərin törədilməsinin qarşısının alınması, habelə təhlükəsizliyin təmin olunması Polis orqanı tərəfindən yüksək səviyyədə həyata keçirilir. Ölkəmizdə ictimai asayişin qorunması vəzifəsini layiqincə yerinə yetirmək Azərbaycan polisinin çiyinlərindədir. Qanunla Polisin hüquqlarının daha geniş olması da fəaliyyət sahələrinin və xidmətin daha çox sahələri əhatə etməsinə zəmin yaradır. Polis ölkəmizdə işinə çox az sayda dövlət strukturlarının qarışa biləcəyi bir orqandır. "Polis haqqında" Qanunun 8-ci maddəsinə əsasən, qanunla səlahiyyət verilmiş şəxslərdən başqa, hər hansı şəxsin istənilən səbəbdən polisin qanuni fəaliyyətinə məhdudiyyət qoyması, təsir və müdaxilə etməsi yolverilməzdir və Azərbaycan Respublikasının qanunvericiliyinə müvafiq qaydada məsuliyyətə səbəb olur.
Son dövrlərdə Azərbaycan polisinin diqqətimizi çəkən yüksək xidmətlərindən biri də profilaktif tədbirlərlə zərərsizləşdirilən narkotacirlərdir. Dünyanı ağuşuna alan, insanlığı, eləcə də daha çox gənclərimizi məhv edən narkotik vasitələrin qanunsuz dövriyyəsi ilə məşğul olan cinayətkarların polisin keçirdiyi əməliyyatlarla həbs edilməsi, Polisin ayıq sayıq xidməti hər birimizi vətəndaş olaraq sevindirir. Çünki övladı olan hər bir Azərbaycan vətəndaşı valideyin ata və ana öz övladını gələcəkdə valideyinlərinə, vətənə, xalqa, dövlətə yararlı görmək istəyir. Cəmiyyətə yararlı vətəndaş olmaq istəyən isə 1-ci növbədə qanunun aliliyini dərk etməli, bir vətəndaş kimi ona riayyət etməlidir. Sağlam cəmiyyətin olması üçün hüquq şərtdir və insanlar həm öz hüquqlarını, qanunu kifayət qədər bilməli, həm də bilməyənlərə təlqin etməlidir. Azərbaycan polisi isə müntəzəm olaraq vətəndaşlar və o cümlədən gələcəyimiz olan gənclərimizlə maarifləndirici görüş keçirir. Bu gün gənclərimiz arasında da bu sahəyə maraq və istək xeyli artıb. Öz vəzifəsini doğru və layiqincə yerinə yetirməyən əməkdaş istənilən sahədə var, bu danılmazdır, ancaq az sayda olan bu xidmətdə olan əməkdaşlar da xalqa polisin bu qədər böyük xidmətinə təbii ki, kölgə sala bilməz. Hər kəs öz vicdanı qarşısında cavab verir. İnanın ki, onlar da zamanla ya layiqincə xidmət etməyə başlayırlar, ya da xidmətdən kənarlaşdırılırlar. Çünki polis elə bir orqandır ki, istər dövlətin, istər xalqın təhlükəsizlik sütunu daha çox bu orqanın üzərində qurulub. Allah vətəninə, xalqına, dövlətinə layiqincə xidmət edən polislərimizi qorusun.
Azərbaycan Respublikasının Prezidenti İlham Əliyev cənabları Azərbaycan polisi haqqında demişdir:
“Azərbaycan xalqı Azərbaycan polisini sevməlidir, ona hörmət etməlidir. Bu gün bu hörmət var və mən istəyirəm ki, daha da çox olsun. Bunu etmək üçün gərək siz yaxşı işləyəsiniz, öz gündəlik fəaliyyətinizdə yaxşı nəticələr göstərəsiniz, cinayətkarlara qarşı daha da amansız mübarizə aparasınız. Mən bu sahədəki fəaliyyətdən razıyam. Demək olar ki, Azərbaycanda uzun illər ərzində nə cinayətkar dəstə problem yarada bilər, nə də ki, başqa qeyri-qanuni birləşmələr mövcud deyildir. Arzu edirəm ki, bundan sonra da doğma Vətənimizə ləyaqətlə xidmət edəsiniz, Azərbaycanın müstəqilliyinin möhkəmlənməsi işində iştirak edəsiniz. Azərbaycanda bu gözəl vəziyyəti daha da möhkəmləndirmək üçün, bu gözəl ab-havanı əbədi etmək üçün əlinizdən gələni edəsiniz. Siz bu vəzifəni ləyaqətlə icra edirsiniz”

Fərid Əmiraslanov
"AYMEDİACOMPANY.AZ mədəniyyət işləri üzrə direktor müavini