Tibb Universitetinin müəllimi Nazxanım Qasımovanın qız tələbələrinə geyimlə bağlı qadağalar tətbiq etdiyi bildirilir. İddialara görə, müəllim bu geyimləri gecə klubuna geyinməyi məsləhət görüb.

Sitat: “Bu geyimdə dərsə gələn tələbələr dərsimə buraxılmır. Dekoltelər, yarım qarış yubkalarınızı gecə klublarında geyinin. Həkimlik öncə deontologiyadan başlayır”.

Məsələ ilə bağlı Globalinfo.az-a fikir bildirən təhsil məsələləri üzrə ekspert Sona Əliyeva deyib ki, universitetlərdə geyim məsələsi müxtəlif mədəniyyətlərdə fərqli cür tənzimlənir.

Onun sözlərinə görə, Azərbaycan universitetlərində geyim sərbəstdir, lakin bizim cəmiyyətdə açıq-saçıq geyimlər bütün zamanlarda birmənalı qarşılanmayıb:

“Ölkəmizdə hər zaman mənəvi və əxlaqi dəyərlər yüksək tutulub. Bu tendensiya davam edir. Universitetlər akademik fəaliyyətin mərkəzi olduğu üçün tələbələrin geyimi sərbəst ola bilər, lakin bu, açıq-saçıq və başqalarını narahat edəcək səviyyədə olmamalıdır. Üstəlik, Tibb Universitetində geyimlə bağlı etik qaydalara xüsusi riayət olunmalıdır”.

S.Əliyeva deyib ki, dünyada tibbi praktika zamanı açıq və diqqəti cəlb edən geyimlərə icazə verilmir:

“Bu, tibb sahəsinin tələb etdiyi ciddilik və etik qaydalara görədir. Açıq geyim həkimlərin peşəkar imicini zədələyir. O baxımdan belə açıq geyimlər cəmiyyət tərəfindən qəbul edilmir.

Deməli, qızım Türkiyədə tibb üzrə təshil alır, 6-cı kurs tələbəsidir. Onlar 3-cü kursdan sonra xəstəxanaya gedirlər və geyimlə bağlı etik qayda var: birmənalı olaraq açıq-saçıq geyinmək olmaz”.

Qeyd edək ki, məsələ ilə bağlı Nazxanım Qasımova universitetin müvafiq şöbəsinə dəvət olunub və onunla bu barədə söhbət aparılıb. Müəllimin məsələyə reaksiyasını ifadə etmə formasının yanlış olduğu nəzərinə çatdırılıb.

Zaira Akifqızı
Globalinfo.az