2 iyun 2025-ci il tarixində Füzuli Dövlət Dram Teatrında Azərbaycanın qəhrəman övladlarından biri – şəhid Məhərrəmov İman Sovet oğlunun xatirəsinə həsr olunmuş möhtəşəm tədbir keçirildi. Tədbir, Şəhidin doğum günündə onun şərəfli həyat və mübarizə yoluna ehtiram əlaməti olaraq təşkil olunmuşdu.
Tədbirin təşkilatçısı "AYMEDİACOMPANY.AZ" saytının təsisçi və direktoru Almaz xanımdır Yaşar, ev sahibi isə teatrın kollektivi – Əməkdar Mədəniyyət İşçisi Vaqif Vəliyevin rəhbərlik etdiyi yaradıcı heyət idi. Tədbirin aparıcısı və ssenari müəllifi "AYMEDİACOMPANY.AZ" saytının mədəniyyət İşləri üzrə direktor müavini Fərid Əmiraslanov idi. Onun duyğulu təqdimatı, hər kəlməsində ruhu titrədən vətən sevgisi, tədbiri yaddaşlara yazılacaq bir mərasimə çevirdi.
Tədbirin açılışı Şəhidlərin ruhuna bir dəqiqəlik sükutla başladı. Azərbaycan Respublikasının ərazi bütövlüyü və azadlığı uğrunda canından keçən bütün qəhrəmanlarımız yad edildi. Daha sonra tədbir iştirakçılarına – Şəhid ailələrinə, Qazilərə, rayon rəhbərliyinə və digər qonaqlara dərin təşəkkür ifadə olundu.
Aparıcı Şəhid İman Məhərrəmovun həyatı barədə geniş və təsirli nitq söylədi. Bildirildi ki, o, 1969-cu ildə Füzuli rayonunun Qazaxlar kəndində dünyaya gəlmiş, uşaq yaşlarından zəhmətə, ailə və vətən sevgisinə alışmış, 1992-ci ilin iyun ayında könüllü olaraq Qarabağ uğrunda döyüşlərə qoşulmuşdur. 26 iyul 1992-ci ildə Ərgünəş dağı istiqamətində gedən döyüşlərdə qəhrəmancasına şəhadətə yüksəlmişdir. Onun ömrü qısa, amma qeyrət və fədakarlıqla dolu idi.
Tədbirin bədii hissəsi isə duyğusal anlarla yadda qaldı. Teatr aktyorları və gənc istedadlar tərəfindən Şəhidlərə həsr olunmuş şeirlər səsləndirildi, vətənpərvərlik ruhlu mahnılar ifa olundu, səhnədə təsirli səhnəciklər nümayiş etdirildi. Bu məqamda tamaşaçılar göz yaşlarını saxlaya bilmədi. Tədbirin hər anında bir amal var idi – şəhidlərimizi unutdurmamaq, onların ruhunu yaşatmaq.
Bu tədbir bir daha göstərdi ki, şəhidlər yalnız ailələrinin deyil, bütün bir xalqın əziz övladlarıdır. Onların xatirəsi təkcə qara lentli portretlərlə deyil, canlı yaddaşla, sənət və sözlə yaşadılmalıdır. Bu baxımdan Füzuli Dövlət Dram Teatrında keçirilmiş bu tədbir vətənpərvərlik tərbiyəsinin gücləndirilməsinə yönəlmiş uğurlu bir təşəbbüs oldu.
Şəhid Məhərrəmov İman Sovet oğlunun ruhu qarşısında bir daha baş əyir, onun timsalında bütün şəhidlərimizi ehtiramla yad edirik.
Ruhu şad, məkanı cənnət olsun!
Yaşasın Azərbaycan!
Yaşasın Şəhidlərimizin əbədi xatirəsi!
Fərid Əmiraslanov
"AYMEDİACOMPANY.AZ" mədəniyyət işləri üzrə direktor müavini
