Kərbəla hadisəsi hicri 61-ci ildə (miladi 680) baş vermiş və İslam tarixində ən çox yadda qalan hadisələrdən biri olmuşdur. Bu, sadəcə bir tarixi faciə deyil, həm də haqq-ədalət uğrunda mübarizənin, insanlığın ali dəyərlərinə sadiqliyin əbədi simvoludur. Hz. İmam Hüseyn (ə) və onun yoldaşları dinin təhrif edilməsinə qarşı çıxaraq, həyatları bahasına haqq yolunda müqavimət göstəriblər.

Aşura günü münasibətilə biz də media nümayəndəsi olaraq Heydər məscidində keçirilən tədbirdə iştirak etdik. Tədbirdə Kərbəla şəhidlərinin əziz xatirəsi yad edildi və bu hadisənin insanlığa verdiyi böyük dərslər haqqında çıxışlar oldu.

Heydər məscidinin imam köməkçisi Hacı Rza Rzayev Aşura ilə bağlı düşüncələrini bizimlə bölüşərək dedi:

“Nədir Kərbəla?
Əsrlərdən bu yana eşq alovu sönməyən, əksinə ildən ilə inanclı könüllərdə taxt quran, insanlığı ali dəyərlər uğurunda birləşdirən, böyük bir dəyər, böyük bir məktəb... Bəlkə də bu suala Hz. İmam Hüseyn(ə)-ın diliylə söylədiyi mübarək bir kəlamıyla cavab vermək daha məqsədəuyğundur.
İmam qardaşına məktubunda buyurur: “Mən babamın dinini dirçəltmək üçün, parçalanmış ümməti islah etmək üçün qiyam edirəm”.
Məqsəd hər hansı bir məqam, hər hansı bir şəxsi istək deyil, əsl hədəf insanlıqdır... Ümmətin birliyi, bərabərliyidir.
Kərbəla sadəcə dini dəyərləri deyil, eyni zamanda aradan getməkdə olan insani dəyərləri qorumaq üçün edilən bir qiyamdır. Bu hadisə bizə insan necə yaşamalıdır, ali dəyərləri necə qorumalıdır və yeri gəldiyi zaman o dəyərlər uğurunda hər bir şeyindən necə keçməlidir dərsini öyrədir.
Kərbəla sadəcə bir zamanla, bir tarixlə məhdudlaşmayan bir dəyərdir... Kərbəlanın verdiyi mesajlar hər bir zamana aiddir.
Kərbəla bizə vəfa, sədaqət, ədalət dərsini öyrədir. Millətindən, dinindən, irqindən asılı olmayaraq harada haqsevər varsa, harada ədalətsevər varsa İmam Hüseyn (ə) onun üçün bir rəhbərdir.
Həmd olsun Allaha, xalqımızın İmam Hüseynə olan sevgisi dünənin, yaxud bugünün sevgisi deyil, bu sevgi əsrlərdən süzülüb gələn xalqımızın ruhunda yer tutmuş ülvi bir dəyərdir. Kərbəla bizim milli kimliyimizə bağlı bir məsələdir. Hətta dini inancı olmayan insan məscidlərə gedərək İmam Hüseynə (ə) olan sevgisini bu şəkildə ifadə etməyə çalışır. Uca Allah bizi sadəcə sözdə deyil, əməldə də sevənlərdən etsin.”

Fərid Əmiraslanov
"AYMEDİACOMPANY.AZ" mədəniyyət işləri üzrə direktor müavini