Bu gün 16 iyul 2024-cü il İslam tarixində böyük bir hadisə olan Kərbəla müsibətində şəhadətə ucalan İslam Peyğəmbəri Məhəmmədin (s.a.s) nəvəsi İmam Hüseynin (ə) anım günü ölkə ərazisində dini icmalar tərəfindən qeyd olunur. Ölkəmizdə yerləşən məscidlərdə, həmçinin insanlar arasında da bu gün ehsan süfrələri verilir. O cümlədən, Azərbaycanın dilbər guşələrindən olan Bərdə şəhərinin imamzadə məscidində və bir çox dini komplekslərdə də bu anım günü qeyd olunur. Şiələrin üçüncü imamı, Kərbəla şəhidi, İmam Hüseyn (ə) İslam inanclarına görə Cənnət gənclərinin ağası hesab olunur. Qardaşı Həsənin (ə) imaməti və xilafəti dövründə onun yanında olmuş və Müaviyə həyatda olduğu müddətcə Həsənin (ə) sülh müqaviləsinə sadiq qalmışdır.

680-cı ildə Müaviyənin ölümüylə birlikdə Yezidə beyət etməyi qanuni bilməmiş və kufəlilərin dəvəti üzərinə Məkkədən Kufəyə doğru yola çıxmışdır. Kərbəlada kufəlilərin xəyanəti nəticəsində Aşura günü Əməvi ordusuna baş əyməmiş və baş verən döyüşdə, İmam Hüseyn (ə) və aralarında qardaşı, oğlanları və qardaşı oğlunun da olduğu təxminən 72 tərəfdarı ilə birlikdə öldürülmüşdür. Yaxınları, ailəsi və tərəfdarları əsir alınaraq Kufə və oradan da Şama göndərilmişdir.

Hüseynin (ə) Kərbəladakı şəhidliyi İslam tarixi və şiəlik baxımından xüsusilə haqq ədalətin bərqərar olunmasında, zülmə boyun əyməmək, İslamın aliliyini önə çıxarmaq baxımından böyük rol oynamışdır. İslam tarixində haqq, ədalət uğrunda döyüşməyin, əyilməməyin, ALLAH sevgisi və qanunlarının rəmzi kimi tarixə keçən Kərbəla hadisəsi minilliklərdir müsəlman aləmində, o cümlədən şiə təriqətinə mənsub olanlar tərəfindən geniş şəkildə qeyd olunur.