Moskva vilayətində Müslüm Maqomayevə həsr olunmuş “XX əsrin orfeyi” adlı musiqili gecə keçirilib.
Rusiyanın Moskva vilayətində Azərbaycanın görkəmli sənətkarı, əfsanəvi müğənni-bəstəkar Müslüm Maqomayevin anadan olmasının 80 illiyi münasibətilə “XX əsrin orfeyi” adlı musiqili gecə keçirilib.
Tədbir “Moskva vilayəti azərbaycanlılarının milli-mədəni muxtariyyəti” regional və yerli təşkilatının təşəbbüsü və təşkilatçılığı, Moskva vilayəti hökumətinin və Lenin şəhər dairəsi administrasiyasının dəstəyi ilə baş tutub.
“Vidnoye” Mədəniyyət Evində gerçəkləşdirilən musiqili gecə Müslüm Maqomayevin həyat və yaradıcılığını əks etdirən video-çarxın nümayiş etdirilməsi ilə başlayıb.
Konsert öncəsi çıxış edən Moskva vilayətinin İnformasiya və Sosial Kommunikasiyalar Nazirliyinin şöbə müdiri Vitali Zamaraxin, Lenin dairəsi administrasiyası başçısının müavini Tatyana Kvasnikova, başçının müşaviri Moisey Şamailov, “Moskva vilayəti azərbaycanlılarının milli-mədəni muxtariyyəti” regional təşkilatının sədri Elşən İbrahimov və “Lenin şəhər dairəsi azərbaycanlılarının milli-mədəni muxtariyyəti” yerli təşkilatının sədri Məmməd Məmmədov unudulmaz sənətkarın Azərbaycan və Rusiya mədəniyyətinə bəxş etdiyi töhfələrdən danışıblar, onun mədəni irsinin əbədi yaşayacağını nəzərə çatdırıblar.
Tədbirin bədii hissəsi Müslüm Maqomayevin məşhur “Azərbaycan” mahnısı ilə açılıb. Konsertdə beynəlxalq müsabiqələr laureatları Ramazan Ramazanov, Mansur Salixov, Olqa Leman-Balaşova və başqaları Müslüm Maqomayevin repertuarından mahnıları ifa ediblər. Konsertdə “Qarabağ” və “Ulduz valsı” rəqs ansamblları da iştirak ediblər.
Tədbir çərçivəsində Müslüm Maqomayevin həyat və yaradıcılığına həsr olunmuş sərgi təşkil edilib.
AY MEDİA COMPANY
