Hər xalqın taleyində Allahın seçdiyi xüsusi insanlar olur – mənəviyyatın təcəssümü, əxlaqın, sədaqətin, xidmətin simvolu olan şəxsiyyətlər. Onlar öz həyatları ilə yalnız öyrətmirlər, həm də örnək olurlar. Bu gün Hacı Rza İslam oğlu Azərbaycan xalqının belə nurlu övladlarındandır. Onun həyat yolu bir iman məktəbidir, əzm, zəhmət və təvazökarlığın möhtəşəm dastanıdır.
1988-ci il oktyabrın 20-də Bərdə rayonunun Qaradəmirçi kəndində sadə və kasıb bir ailədə dünyaya gələn Hacı Rza uşaqlıqdan böyük arzuların sahibiydi. Atası zəhmətkeş bir insan, ailəsi isə imanlı və təvazökar idi. Maddi çətinliklər onların həyatına çox şeylər qadağan etsə də, mənəvi zənginlik heç zaman əskik olmadı.
Kiçik yaşlarından Quranın sehrinə könül verən Hacı Rza təhsil illərində kəndlər arasındakı uzun və çətin yolları piyada qət edərək Bərdə Cümə məscidinə gedərdi. O illərin soyuğu, çətinliyi, ayaqlarını yoran yol onun imanını zərrə qədər də sarsıda bilmədi. Məsciddə rayonun tanınmış axundu Hacı Ramazan Hüseynovdan Qurani-Kərim və ilkin dini bilikləri öyrənərək mənəviyyatın əsl mənasını dərk etdi.
O, sadəcə nəzəri öyrənməklə kifayətlənmədi. Həyatını əsl dindar kimi yaşadı. Çünki iman onun üçün sadəcə bilik deyil, bir həyat tərzi idi. Özünün tez-tez vurğuladığı bir Quran ayəsini həyatının şüarına çevirdi:
“Ey iman gətirənlər! Etmədiyiniz şeyi niyə deyirsiniz? Etmədiyinizi deməyiniz Allah yanında böyük qəzəbə səbəb olar.” (Saff, 2-3)
Bu ayə onun varlığının mayasına çevrildi. O, insanlara yalnız danışmadı, əvvəlcə özü yaşadı, sonra başqalarına tövsiyə etdi.
Elm və əməl vəhdəti
2006-cı ildə Bakı İslam Universitetinin “İslamşünaslıq” fakültəsinə daxil olan Hacı Rza, 2011-ci ildə “İslamşünas”, “Qurani-Kərim müəllimi”, “İlahiyyatçı” ixtisaslarını bitirdi. Təhsilini başa vurduqdan sonra Vətənə borcunu ödəmək üçün Daşkəsəndə yerləşən “N” saylı hərbi hissədə xidmət etdi. Onun xidmət etdiyi hissənin komandiri şəhid generalımız Polad Həşimov idi. Burada o, “çavuş” rütbəsi ilə xidmətini tamamladı.
2015–2021-ci illərdə Bakı İslam Universitetində Qurani-Kərim müəllimi kimi minlərlə gəncə Allahın kəlamını öyrətdi. Daha sonra Qafqazın ən böyük məscidi olan Heydər Məscidində müəzzin, ardınca isə İmam müavini kimi xidmət göstərdi. Hazırda da müqəddəs Qurani-Kərimi tədris edərək nəsillərin mənəvi tərbiyəsinə töhfə verir.
Beynəlxalq arenada uğurlar
Hacı Rza yalnız ölkəmizdə deyil, beynəlxalq arenada da Azərbaycanı ləyaqətlə təmsil etmişdir. 2017-ci ildə İran İslam Respublikasının Şiraz şəhərində keçirilən İslam Əməkdaşlıq Təşkilatına üzv ölkələr arasında “Beynəlxalq Quran Müsabiqəsi”ndə 23 ölkə arasında 3-cü yerə layiq görüldü. 2019-cu ildə Türkiyədə keçirilən “Qur’an-ı Kerim Gözəl Oxuma” müsabiqəsində isə 62 dövlət arasında yarımfinala yüksəldi.
Qarabağda tilavət – mənəviyyatın qürur anı
Vətən müharibəsindən sonra Şuşada Gövhər Ağa məscidində qılınan ilk bayram namazında Qurani-Kərim tilavətini həyata keçirən Hacı Rza o anlarda yalnız bir din adamı deyil, həm də bir millətin qürur mənbəyinə çevrildi. Onun səsi Şuşanın minarələrindən yüksəlib Qarabağın azad ruhuna qarışdı.
İslam Əməkdaşlıq Təşkilatının “Gənclər Paytaxtı” layihəsinin açılış və 2024-cü il dekabrın 2-də bağlanış mərasimində Qurani-Kərim qiraəti ilə çıxış edən Hacı Rza bu sahədəki əvəzsiz xidmətlərini davam etdirdi.
Könüllərin sevimlisi
Hacı Rza tez-tez deyir:
“Mən heç vaxt yüksək vəzifə sahibi olmaq istəməmişəm. Mən yalnız insanlara xidmətçi olmağı seçmişəm.”
Onun təvazökarlığı, əxlaqı, sadəliyi və böyük ürəyi onu yalnız bir din adamı deyil, mənəviyyatın canlı təcəssümü edib.
Hacı Rza həmçinin Space TV-də “İnam”, İctimai TV-də “Din və Cəmiyyət” verilişlərində çıxış edərək dinimizin həqiqətlərini xalqa çatdırır, minlərlə insanın qəlbinə nur saçır.
Bu gün ailəli və iki övlad atası olan Hacı Rza, həm ailəsinə, həm də bütün Azərbaycan xalqına mənəvi dayaqdır.
Hacı Rza – Azərbaycanın, Qarabağın, Bərdənin fəxri
Hacı Rza İslam oğlu bir ömürlük xidmət və imanla göstərdi ki, əsl dindar olmaq yalnız öyrətmək deyil, yaşamaqdır. Onun həyat yolu bir məktəbdir – əzmkarlığın, sədaqətin və xidmətin məktəbi.
Azərbaycan, Qarabağ və doğma Bərdə bu böyük şəxsiyyətlə fəxr edir. Onun səsi minarələrdən əbədi ucalacaq, öyrətdiyi mənəviyyat isə nəsillərin qəlbində yaşayacaq. Biz də Hacıya bu çətin və şərəfli peşəsi və həyat yolunda uğur, müvəffəqiyyət, qətiyyət arzu edirik. Ömrünüz bərəkətli olsun hacı, siz əsl insanlıq nümunəsisiniz.
Fərid Əmiraslanov
AYMEDİACOMPANY.AZ mədəniyyət işləri üzrə direktor müavini
