Azərbaycanın Şanlı Ordusu bizlərə qələbə sevinci yaşatdı. Bu sevincin içində bizi kədərləndirən igidlərimizin yarım qalmış ömür hekayəsi oldu. Biz fərqində olmamışıq necə qəhrəmanlar böyüyüb. Fərqində olmadığımız igidlərimiz 30 illik arzularımız,xəyallarımızı 44 gün ərzində həqiqətə çevirdilər. Sonunda illərlə həsrətini çəkdiyimiz torpaqlara igidlərimizin qəhrəmanlığı sayəsində qovuşa bildik. Bizim borcumuz isə onları unutmamaq və cəmiyyətə tanıtmaqdır.
Vətən müharibəsinin fədakar gənclərindən biri də döyüşlərdə qəhramancasına şəhid olmuş Nurlan Etibar oğlu Ağakişiyevdir.
Nurlan Ağakişiyev 2002-ci il iyulun 22-də Sumqayıt şəhərində Qarabağ müharibəsinin qazisi Etibar Ağakişiyevin ailəsində anadan olub. 2008-2017-ci illərdə Abşeron rayonunun Mehdiabad qəsəbəsində 3 nömrəli tam orta məktəbdə təhsil alıb. 2017-2019-cu illərdə isə İdarəetmə və Texnologiya Kollecində təhsil alıb. Subay idi.
Nurlan Ağakişiyev 2020-ci ildən Azərbaycan Silahlı Qüvvələrinin "N" saylı hərbi hissəsində müddətli həqiqi hərbi xidmətdə idi.
Azərbaycan Ordusunun əsgəri olan Nurlan Ağakişiyev 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi üçün başlanan Vətən müharibəsi zamanı Ağdam rayonu istiqamətində sentyabrın 28-də şəhid olub. II Fəxri Xiyabanda dəfn olunub.
Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin 15.12.2020-ci il tarixli Sərəncamına əsasən Nurlan Ağakişiyev ölümündən sonra "Vətən uğrunda" medalı ilə təltif edildi.
Azərbaycanın Ağdam rayonunun işğaldan azad edilməsi uğrunda aparılan döyüş əməliyyatlarına qatılaraq şəxsi igidliyi və şücaəti nümayiş etdirdiyinə görə Azərbaycan Prezidenti İlham Əliyevin 24.06.2021-ci il tarixli Sərəncamına əsasən Nurlan Ağakişiyev ölümündən sonra "Ağdamın azad olunmasına görə" medalı ilə təltif edildi.
Azadlığımız,Vətənimiz,torpaqlarımız uğrunda canlarından keçən bütün şəhidlərimizi sevgi və rəhmətlə anırıq.
Vətənimizin bütövlüyü uğrunda canlarından keçən bütün şəhidlərimiz dünya durduqca əbədi olaraq daim xatirələrimizdə,qəlbimizdə yaşayacaqdır.
Aymediacompany.az
