Torpaqlarımızın qorunması,Vətənimizin müdafiəsi uğrunda canından, qanından keçərək Şəhidlik zirvəsinə ucalmaq ən böyük şərəf və qürurdur.
Bu şərəfli və qürurlu yoldan onun da adı keçdi. Şəhid Cavid Cabarzadə!
O, 44 günlük Vətən müharibəsində qəhrəmanlıq salnaməsi yazdı. Bu gün zəfər sevincimizdə Cavidin də payı var. O, elə müharibənin başladığı ilk günlərdə - 29 sentyabr könüllü olaraq yola düşüb. 24 yaşlı ürəyi Vətənlə, torpaqla döyünən Cavid Fizuli, Cəbrayıl, Qubadlı, Zəngilan döyüşlərində iştirak edib. 24 oktyabr tarixində Xocavənd istiqamətində gedən döyüşlərdə qəhrəmancasına Şəhid olub. Bu günsə cənnətdəki ilk doğum günüdür Onun. Biz də “AY Media Company” olaraq Cavidin ilk mövlud günündə gördüklərimizi qələmə aldıq. Tədbirin ilk dəqiqələri bəstəkar-müğənni Ruslan Səfəroğlunun Cavidə həsr etdiyi musiqi ilə anıldı.

Daha sonra Qafqaz Müsəlmanları Ruhani İdarəsinin nümayəndəsi Hacı Surxay nitqində Şəhidliyin nə qədər ali bir hiss olduğunu tədbir iştirakçılarına nəql elədi. Cavid haqqında fikirlərə "Vəhdət Xeyriyyə Cəmiyyəti" nin nümayəndələri Hacı Elqayat,Seyid Taleh də qatıldı. "Vətən Naminə" Şəhid ailələrinə dəstək İctimai Birliyinin sədri Tünzalə Allahverdiyeva Şəhid analarına Birliyin təsis etdiyi "Şəhid Anası" medalını təltif etdi. Medalı Şəhid Analarına birliyin üzvü Könül xanım - Almaz Cabarova, Nənəxanım Ağayeva, Mirvari Həsənova və Mələk Həsənovaya təqdim etdi. Qəlblərində övlad acısı yaşayan analar kövrək olsalar da, bir o qədər qürurlu və məğrur idilər. Axı azad olunan, o cənnət qoxan torpaqlarımızda onların övladlarının da qanı var.

Canından Vətəninə can verib Vətən olan Cavidimiz, Mövludun mübarək! Şəhadət şərbətini içərək Şəhidlik zirvəsinə yüksələn Cabarzadə Cavid Qorxmaz oğlu, ruhun şad olsun!

AY MEDIA COMPANY