Sumqayıtda polis əməkdaşları bıçaqlanıb.
Şəhər prokurorluğundan verilən məlumata görə, dekabrın 28-də şəhər ərazisindəki “Azpetrol”un yaxınlığında Sumqayıt şəhər polis idarəsinin əməkdaşlarına xəsarətlər yetirilərək zor tətbiq olunması ilə bağlı məlumat daxil olub.
Araşdırmalarla müəyyən edilib ki, paytaxt sakini Ağa Əzimov qeyd edilən yanacaqdoldurma məntəqəsinin yaxınlığında əməliyyat tapşırığına əsasən həmin vaxt xidməti vəzifələrini icra edən Sumqayıt ŞPİ-nin Cinayət-axtarış şöbəsinin əməliyyat müvəkkili Xəqani Məmmədov və kiçik inspektoru Orxan Baxşəliyevə bıçaqla müxtəlif dərəcəli bədən xəsarətləri yetirərək hadisə yerindən qaçıb.
Əməliyyat-axtarış tədbirləri nəticəsində Ağa Əzimov saxlanılıb. Faktla bağlı Cinayət Məcəlləsinin 315-ci (hakimiyyət nümayəndəsinə qarşı müqavimət göstərmə və ya zor tətbiq etmə) maddəsi ilə cinayət işi başlanıb. Ağa Əzimov şübhəli şəxs qismində tutularaq istintaqa cəlb edilib. İstintaq davam edir.
