Saatlının Sarıcalar kənd orta məktəbində uzun illər Azərbaycan dili və ədəbiyyatdan dərs deyən Həmayə Vəlişova iyunun 13-də vəfat edib. Amma onun yaxınları dəfn pulunu ala bilmədiklərini deyirlər. DİA.AZ-ın məlumatına görə, həmayə müəllimənin oğlu Anar Vəlişov danışır ki, anasının qırx mərasimi başa çatmamış Dövlət Sosial Müdafiə Fondunun Saatlı rayon şöbəsinə müraciət edib. Ona gecikdiyini bildiriblər. Anar Vəlişovun bütün cəhdləri boşa çıxıb: “Əlbəttə, mənə anam lazım idi, pulu yox. Amma adamı yandırır. Mənə təsir eləyən odur ki, gör neçə adamı aldadırlar. Cəmi 46 manat 10 qəpik verdilər. Guya pensiya alınandan üç gün sonra ölüb deyə, o günləri hesablayıb veriblər. Sosial Müdafiə Fondunun rayon şöbəsinə getdim, dedilər, gərək tez gələydiniz. Necə tez gələydim?! Mənim ölüm ortalıqda idi. Pul haqqında düşünmək vaxtı deyildi. Bir az baş açılandan sonra getdim. Hətta dedim ki, heç olmasa, yarısını verin. Dedilər, düzələn məsələ deyil. Qulaq asan olmadı. Eşitdim ki, 600 manat verilməsi normativi çıxıb. Biz heç bu pulu da görməmişik”.

Anar Vəlişov deyir ki, anası əvvəl 968 manat təqaüd alırmış. Sonra məbləğ bir az da artıb. Qadın vəfat edəndə aylıq təqaüdü təxminən 990-995 manat imiş.

“2016-cı ildə həm staja, həm də üç uşağa görə təqaüdə çıxmışdı. 968 manat dəqiq yadımda qalıb. Pensiyanın baza hissəsi 10 ildən bir artır. Onda məbləğ 1000 manata yaxınlaşmışdı. Məktəbdən hesablaşanda da hər şeyi nəzərə almışdılar. Necə lazımdısa, sağollaşmışdılar. Çox vicdanlı davranmışdılar. Hətta artıq verdilər. Götürmək də istəmirdik. Dedilər ki, hesab eləyin, yas xərclərinə kömək eləmişik”, - Anar Vəlişov belə deyir.

Onun sözlərinə görə, vəfat edən şəxsin təqaüdünün üç misli qədər dəfn pulu verilməlidir.

Həmayə Vəlişovanın 65 yaşı tamam olubmuş. Amma müqavilə ilə işini davam etdirirmiş. Azı bir il də məktəbdə işləməliymiş: “Hər ay neçə yerə pul ödəyirdi. Bu məsələlərə çox həssas yanaşırdı. İşini vicdanla görürdü. İndi halal pulunu istəyirik, başlarını tuturlar. Deyirlər ki, qanun dəyişib. Eşitdim ki, pensiya fondu məktəbin üstünə atıb. Amma fond üzərinə düşəni eləməliydi. Heç kimdən bizə düşməyən pulu istəmirik. Qanunlar nə deyirsə, o cür olsun”.

Anar Vəlişov anasının yas mərasimləri bitəndən sonra da bir dəfə də Dövlət Sosial Müdafiə Fondunun Saatlı rayon şöbəsinə gedib. Rəhbərliklə görüşmək mümkün olmayıb: “İki əməkdaşla görüşdüm. Adları yadımda qalmayıb. Yenə onu eşitdim ki, düzələn məsələ deyil. Adam var, dirənir. Mən elə davranmaq istəmədim. Yəni hansısa mənada abrımı gözlədim. Belə də olmaz. Artıq pul istəmirik axı. Haqqımız çatanı versinlər...”

Dia.az xatırladır ki, bir müddət əvvəl anoloji şikayətlə Qazax rayon sakini Qocayeva Nərmin Cəlil qızı da yaşadığı rayonda Dövlət Sosial Müdafiə Fondunun işçilərindən şikayətçi olduğunu bildirmişdi. DİA.AZ-a bu barədə müraciət edən narazı vətəndaş bildirirdi ki, bu il ərzində atası ilə anasını itirib.

"Onsuz da dərdimiz bizə yetərlidir, bir yandan da DSMF işçilərinin özbaşınalığı bizi təngə gətirib. Mərhum atam Qarabağ qazisi olub, artıq qırxı çıxıb. Bunların şərəfsizliyinə bax ki, mərhum atamın 17 ay pensiya almasını qanunsuz elan edərək bu gün bizə düşən ölüm pullarını ödəməkdən imtina edirlər.

Bu azmış kimi, bizi hətta hədələyirlər ki, mərhum atam Qəcayev Cəlil Hüeynəli oğlu guya ki, qanunsuz olaraq 17 ay pensiya alıb və buna görə hüquqi araşdırma başlaya bilər. Halbuki atam bir Qarabağ qazisi olaraq, zabit olaraq məhz bu gün DSMF-də çalışan özbaşına məmurların səbəbindən öz hüquq və imtiyazlarından yararlana bilməyib".

DİA.AZ vasitəsilə Əmək və Əhalinin Sosial Müdafiəsi Naziri Sahil Babayevə müraciət edən Nərmin Qocayeva DSMF işçilərinin cəzalandırılmasını, mərhum valideynlərinin ölüm faktlarına görə nəzərdə tutulan müavinətin verilməsini tələb edir.

Mövzu diqqətimizdədir. İddia olunanlarla bağlı bütün maraqlı tərəfləri dinləməyə hazırıq...