Sumqayıt Dövlət Dram Teatrında 21.01.2024 tarixində premyera gerçəkləşib. Öncə Mədəniyyət Nazirliyinin təşəbbüsü ilə 20 Yanvar faciəsinin tarixi- fəlsəfi mahiyyətini anladan "Silahdaşlar" sənədli filmi nümayiş etdirilib.
Teatrın direktor vəzifəsini icra edən Əməkdar artist Vidadi Məmmədov, baş rejissor, Xalq artisti Firudin Məhərrəmov, tamaşanın quruluşçu rejissoru, Əməkdar mədəniyyət işçisi Vasif Məmmədov, truppa müdiri Zöhrəli Əliyev çıxış edərək milli mücadilə tariximizdə önəmli yer tutan 20 Yanvar faciəsindən, səhnə əsərlərində qəhrəmanlıq yolunun öz əksini tapmasından, habelə Sumqayıt teatrının repertuar siyasəti barəsində danışıblar.
Ardından Türkiyə yazıçısı Tüncer Cücenoğlunun "Uçqun" əsəri Vasif Məmmədovun quruluşunda təqdim olunub. Tamaşanın quruluşçu rəssamı Nizami Dadaşov, musiqi tərtibatçısı sənətşünaslıq üzrə fəlsəfə doktoru Telman Qəniyevdir.Tamaşada qəlibləşmiş adətlər, konservativ düşüncələr, bəsit inanclar saf sevgi ilə üz- üzə qalır və sonda məhəbbət qalib gəlir. Tamaşa alqışlarla qarşılanıb.

Leyla Hafizqızı
Sumqayıt Dövlət Dram Teatrının mətbuat xidmətinin rəhbəri