28 iyul 1698-ci ildə ingilis hərbi mühəndisi və ixtiraçısı Tomas Saveri (Tomas Savery) dünyada ilk buxar maşınına patent aldı. Buxar maşını sənayedə kifayət qədər geniş tətbiq olunurdu. Məsələn, onun köməyi ilə şaxtalardan su çıxarılırdı. Patent sənədində belə yazılmışdı: “Bu yeni ixtira su çıxarılması, alovun köməyilə istehsalın bütün növlərinin hərəkətə gətirilməsi üçündür.”
Dahi alman bəstəkarı və orqan musiqiçisi, Barokko dövrünün görkəmli nümayəndəsi, bütün dövrlərin ən böyük bəstəkarlarından biri İohann Sebastyan Bax (Johann Sebastian Bach) 1750-ci ilin bu günü 65 yaşında dünyadan köçüb.
Klassik alman fəlsəfəsinin banilərindən olan Lüdviq Feyerbax 1804-cü ilin 28 iyulunda anadan olub. 26 yaşında ikən (1830) “Ölüm və ölməzlik” adlı əsərini yazıb. Feyerbax Şegel fəlsəfəsinin əksinə olaraq dinlə fəlsəfəni bir-birinə zidd dünyagörüşü formaları hesab edib. (1804-1872)
1821 — Xose de San-Martin (şəkildə) Perunun İspaniyadan müstəqilliyini elan etdi. Bu əraziyə 1531-ci ildən ispanların müdaxiləsi başlanıb, 13 il sonra isə (1544) Peru İspaniya Vitse-krallığı adlandırılıb.Düz 280 il sonra - 1821-ci ilin 28 iyulunda Peru xalqı müstəqilliyini elan edib.
1896 — Floridada Mayami şəhərinin əsası qoyuldu.
1914 — İyul böhranının kuliminasiya nöqtəsi kimi Avstriya-Macarıstan Serbiyaya müharibə elan etməklə Birinci dünya müharibəsinin başlamasına səbəb olur. İngiltərə və Fransanın idarə etdiyi Antanta dövlətləri ilə Almaniyanın rəhbərliyindəki İttifaq qüvvələri arasındakı bu müharibə 4 il sürdü. 1917-ci ildə Amerika Birləşmiş Ştatlarının da qatılması ilə bütün cəbhələrdə uduzan Almaniya və müttəfiqləri sülh müqaviləsi imzalamaq məcburiyyətində qaldı. Təxminən 70 milyon əsgərin döyüşdüyü Birinci Dünya Müharibəsində müxtəlif cəbhələrdə 9 milyon hərbçi və on minlərlə sadə vətəndaş həyatını itirdi. Bu müharibənin nəticəsində savaşa qatılan ölkələrin bir çoxunda yeni siyasi hökumətlər meydana gəldi və imperatorluqlar dağılma prosesinə girdi.
Adı dünya neft tarixinə Tümenin (Rusiya) zəngin sərvətlərinin ilk kəşfiyyatçılarından biri kimi daxil olan Azərbaycanın görkəmli neftçi, mühəndis-geoloq alimi, Rusiya Elmlər Akademiyasının müxbir üzvü Fərman Salmanov 1928-ci ilin bu günü anadan olub. Azərbaycan Sənaye İnstitutunu bitirdikdən sonra bir müddət geoloji ekspedisiyada çalışıb. 31 yaşından (1959) Tümen Ərazi Geologiya İdarəsi Surqut Neft Kəşfiyyatı Ekspedisiyasına rəhbərlik edib, Qərbi Sibirdə ilk neft yataqlarını üzə çıxarıb. Fərman Salmanov 1987-1991-ci illərdə SSRİ geologiya nazirinin müavini vəzifəsində çalışıb. (1928-2007)
28 iyul peşəkar Azərbaycan musiqisinin görkəmli nümayəndəsi, bəstəkar, dirijor Müslüm Maqomayevin xatirə günüdür. Qori Seminariyasını bitirdikdən sonra bir müddət Şimali Qafqazda və Lənkəranda müəllim işləyib, oradakı məktəblərdə xor, dram dərnəyi, orkestr təşkil edib.Bir çox xalq mahnısını nota salan M.Maqomayev 27 yaşından (1912) ömrünün sonunadək (1937) opera tamaşalarının dirijoru olub. Azərbaycanın ilk muğam-operalarından olan “Şah İsmayıl”, Azərbaycan musiqili teatrının inkişafında mühüm mərhələ olan “Nərgiz” operaları və “Radio marşı”nın müəllifidir.
1942 — II DM: Stalin Sovet ordusunun döyüş əzmində dönüş yaradan, döyüşdə geri çəkilməyi qadağan edən 227 nömrəli əmri imzaladı.
1943 — II DM: Qomorra əməliyyatı çərçivəsində Kral Hava Qüvvələrinin Hamburqu bombalaması nəticəsində 42 min dinc sakin həlak oldu.
28 iyul 1976-cı ildə Çinin Tanqsan şəhərində 7,8 bal gücündə böyük zəlzələ baş verdi. Minlərlə binanın yerlə yeksan olduğu bu zəlzələdə 240 mindən çox insan həyatını itirdi.
2010 — Pakistanda Airbus A321 təyyarəsinin qəzaya uğraması nəticəsində 152 nəfər həlak oldu.
