Azərbaycan qadını tarixən müdriklik, müqəddəslik simvolu olub, iti zəkası, dərin düşüncəsi ilə dövlətçilik işində də, mədəni inkişafımızda da müstəsna xidmətlər göstərib. 1914-cü ildə valideynlərini itirmiş uşaqlara, yoxsul ailələrə və qaçqınlara yardım məqsədilə Bakı Müsəlman Qadın Xeyriyyə Cəmiyyəti yaradılıb. Cəmiyyətin təsisçisi fəal maarifçi Rəhilə Hacıbababəyova idi.

Bakı Müsəlman Qadın Xeyriyyə Cəmiyyətinin təsisçisi olmuş Rəhilə xanım İbrahim bəy qızı Hacıbababəyova (Hacıbababəyzadə) 1882-ci il 13 avqustda Tiflisdə dünyaya göz açıb. Bu şəhərdə Müqəddəs Nina məktəbini bitirib. Müəllimlik fəaliyyətinə 1902-ci ildə Bakıdakı İsgəndəriyyə Qadın Müsəlman Məktəbində başlayıb. 1910-cu ildə Rəhilə xanımın təşəbbüsü ilə azərbaycanlı qızlar üçün ikiillik məktəb açılıb. Bu təhsil ocağı 1914-cü ildə ibtidai məktəbə çevrilib. Rəhilə xanım həmin məktəbin direktoru olub.

Rəhilə Hacıbababəyova 1925-ci ildə Azərbaycan SSR Maarifçilər Həmkarlar İttifaqı mərkəzi şurasının üzvü seçilib. 1927-ci ildə 5-ci Ümumittifaq Sovetləri və Azərbaycan qadın fəhlələri və kəndliləri qurultayının nümayəndəsi olub.

Həmin illərdə maarifçilik sahəsində məqsədyönlü işlərin həyata keçirilməsinə böyük ehtiyac duyulub. Məktəblərin sayı az idi. Savadsızlıq cəmiyyətdə ətalətin yaranmasına rəvac verirdi. Bu səbəbdəndə oxumağa, savad almağa meyil göstərənlərin sayı çox deyildi. Oğlan uşaqlarınında məktəbə, təhsilə cəlb edilmədiyi bir dövrdə qız övladlarının maariflənməsinə xüsusilə laqeyd yanaşılırdı.

Bakı Müsəlman Qadın Xeyriyyə Cəmiyyəti qızların oxuması, təhsil alması istiqamətində fəaliyyətə başlayıb. Cəmiyyətin maarifçilik sahəsində ən mühüm xidmətlərindən biri Bakıda yoxsul qızlar üçün peşə məktəbi açması olub. 1917-ci ilin oktyabrından fəaliyyət göstərən məktəbdə 4 ümum təhsil sinif və 6 peşə bölməsi yaradılıb. Burada türkdili, hesab, əlişi, biçmə və tikiş üzrə dərslər keçirilib.

Rəhilə xanım Hacıbababəyova 1954-cü ildə Bakıda dünyasını dəyişib