837-ci ilin 26 avqustunda Xürrəmilərin sığınacağı olan Bəzz qalası süqut etdi.
1071-ci ilin 26 avqustda Sultan Alp Arslanın başçılıq etdiyi Səlcuq ordusu ilə Bizans imperatoru Romen Diogenin qoşunları arasında Malazgird döyüşü (Türkiyənin Muş vilayətinin ərazisi) baş verib. Alp Arslanın 50 minlik süvari ordusu bizanslıların 200 minlik qoşunu üzərində qələbə çalıb. Bu qələbədən sonra türklərin Səlcuqlu dövləti Qafqaz-Yaxın Şərq regionunda hegemon gücə çevrilib.
1789-cu ilin 26 avqustunda Fransa Parlamenti "İnsan və Vətəndaş Haqları Bəyannaməsi"ni qəbul etdi.
1847-ci ilin 26 avqustunda Liberiyanın müstəqilliyi elan edildi.
1920-ci ilin bu günü ABŞ-da qadınlara seçkilərdə iştirak etmək hüququ verən konstitusiya düzəlişi qüvvəyə mindi.
26 avqust 1921-ci ildə baş komandir Mustafa Kamal Paşa Sakarya Meydan müharibəsində tarixi göstərişini verdi: “Xətti müdafiə yoxdur, səthi müdafiə vardır. O səth bütün vətəndir”.
1936-cı ildə Böyük Britaniya Süveyş kanalını öz nəzarətində saxlamaqla Misirə müstəqillik verdi.
26 avqust 1936-cı ildə İngiltərənin yayım qurumu “BBC” ilk televiziya yayımını başladı.
1938-ci ilin 26 avqustunda görkəmli hərbi xadim, Azərbaycanın ilk milli atıcı diviziyasının komandiri Cəmşid Cəfərqulu oğlu Naxçıvanski vəfat edib (1895-1938). Cəmşid Naxçıvanski bacarıqlı sərkərdə kimi şərəfli döyüş yolu keçib. O, milli hərb sənəti tarixinə dəyərli töhfələr verib, yüksək ixtisaslı hərbçi kadr hazırlığı sahəsində əvəzsiz xidmətlər göstərib. Cəmşid Naxçıvanski 1930-cu illərin ağır repressiyalarına məruz qalmış və totalitarizmin qurbanına çevrilmiş vətənpərvər şəxsiyyətlərdəndir. Prezident İlham Əliyevin Sərəncamı ilə onun 120 illik yubileyi ölkəmizdə geniş qeyd olunub.
1957-ci ildə ilk tranzistorlu radio satışa çıxarılıb. 1947-ci ildə tranzistorun ixtirasından sonra bu mexanizmin ən çox istifadə olunduğu qurğu məhz tranzistorlu radio hesab edilir. 1954-cü ildən etibarən təkmilləşdirilməyə başlayan bu elektronik kommunikasiya qurğusunun satışı 1960-1970-ci illərdə milyardı ötmüşdü.
26 avqust 1972-ci ildə TRT ölkə xaricindən ilk birbaşa yayımı Münhen Olimpiadalarından reallaşdırdı. Münhen Olimpiadaları 11 israilli idmançının ölümü və amerikalı üzgüçü Mark Spitzin 7 qızıl medal qazanması ilə yaddaşlarda qaldı.
26 avqust 1974-cü ildə Atlantik okeanını təyyarə ilə keçən ilk pilot Çarls Lindberq həyatını itirdi.
2003-cü il. Milli kino və teatr sənətinin görkəmli nümayəndəsi, Dövlət mükafatı laureatı, Xalq Artisti Həsən (Əbdülhəsən) Ağaməmməd oğlu Məmmədov ömrünün 65-ci ilində vəfat edib (1938-2003). Onun “Böyük dayaq” (Qaraş), “Arşın mal alan” (Əsgər), “Gün keçdi” (Oqtay), “Arxadan vurulan zərbə” (Qəmərlinski), “İstintaq” (Murad), “Axırıncı aşırım” (Abbasqulu bəy), “Yeddi oğul istərəm” (Bəxtiyar), “Bir cənub şəhərində” (Murad) və digər filmlərdə yaratdığı obrazlar qalereyası təbiiliyi və özünəməxsusluğu ilə fərqlənir.
Avqustun 26-sı Beynəlxalq Azərbaycan Muğamı və Musiqisi Günüdür. 2010-cu ildə Kanadanın Niaqara şəhərinin meriyası və ənənəvi olaraq hər il keçirilən Beynəlxalq Niaqara musiqisi festivalının rəhbərliyi tərəfindən qəbul olunan bu qərar xalqımızın milli sərvəti olan muğamın bəşəri musiqiyə çevrildiyini bir daha təsdiqləyir. Xatırladaq ki, muğam və tar ifaçılığı sənəti UNESCO-nun dünya mədəniyyətinin qeyri-maddi irsi siyahısına da daxil edilib.
2014-cü il. Azərbaycan Xalça Muzeyinin yeni binasının açılışı olub. Açılış mərasimində Prezident İlham Əliyev iştirak edib. Muzeyin binasını tanınmış avstriyalı memar Frans Yants layihələndirib. Hazırda muzeyin sərgi və fondlarında 13 min 300-dən çox eksponat və əşya saxlanılır.
