1494-cü il 6 noyabr tarixində Osmanlı imperatoru I Sultan Süleyman Qanuni anadan olub (1494-1566). 1520-ci ildə taxta çıxan Qanuni 46 illik hakimiyyəti dövründə bir çox ölkələri fəth edərək imperiyanın sərhədlərini Afrikayadək genişləndirib.
6 noyabr 1860-cı ildə Abraham Linkoln (Abraham Lincoln) Amerika Birləşmiş Ştatlarının 16-cı prezidenti seçildi. A.Linkoln Amerika vətəndaş müharibəsi dövründə köləliyi müdafiə edən cənub əyalətlərinə qarşı zəfər qazanaraq ölkənin birliyini qoruyan lider sayılır. ABŞ-da köləlik Abraham Linkolnun dövründə qadağan edilib.
1861-ci il 6 noyabr tarixində Cefferson Devis Amerika Konfederativ Ştatlarının prezidenti seçildi
Dünyaşöhrətli rus bəstəkarı Pyotr İliç Çaykovski 1893-cü il 6 noyabrda Sankt-Peterburqda 53 yaşında dünyasını dəyişib. (1840-1893)
Özbəkistanın tanınmış yazıçısı və dövlət xadimi Şərəf Rəşidov 1917-ci ilin bu günü dünyaya gəlib. 1959-cu ildə Özbəkistan Kommunist Partiyasının birinci katibi seçilib. Yüksək dövlət vəzifələrində çalışmaqla yanaşı, bədii yaradıcılığını da davam etdirən, bir sıra roman, povest və publisistik əsərlərin müəllifi olan Şərəf Rəşidov Yenidənqurma dövründə haqsız hücumlara məruz qalıb, vəzifəsindən kənarlaşdırılıb, bundan bir qədər sonra isə vəfat eidb. Özbəksitan istiqlaliyyətini bəyan etdikdən sonra Daşkənddə Şərəf Rəşidovun abidəsi ucaldılıb, küçələrə və mədəniyyət obyektlərinə onun adı verilib. (1917-1984)
6 noyabr Azərbaycanda Radio və Televiziya İşçilərinin Peşə Bayramıdır. 1926-cı il noyabrın 6-da Azərbaycanda ilk dəfə radio verilişlərinin yayımına başlandı. Həmin gün ölkə paytaxtının küçələri və meydanlarında qurulmuş reproduktorlardan ilk dəfə “Danışır Bakı” deyildi. Bu hadisə o vaxt Azərbaycan xalqının siyasi və mədəni həyatında böyük bir yenilik idi. Azərbaycan Televiziyası yaranandan sonra isə bu tarix təkcə radionun deyil, həm də birlikdə teleradionun yaranma günü kimi qeyd olunmağa başladı. Azərbaycan müstəqillik əldə etdikdən sonra müstəqil teleradio şirkətlərin sayı artıb. Hazırda Bakıda dövlət və özəl telekanalların sayı 10-a çatıb. Regionlarda 12, Naxçıvanda isə 2 telekanal fəaliyyət göstərir.
1937-ci il 6 noyabr tarixində İtaliya Almaniya və Yaponiya arasında imzalanmış antikomintern paktına qoşuldu.
1943-cü il 6 noyabr tarixi Kiyev alman qoşunlarından azad edilib.
1944-cü il noyabrın 6-da ABŞ Hanford Atom Mərkəzində ilk dəfə ortaya plutonam çıxardı. Bu plutonam Yaponiyanın Naqasaki şəhərinə atılan atom bombasının istehsalında istifadə edildi.
1967-ci il 6 noyabr tarixində Bakı metrosu işə salınıb. İlk mərhələdə beş stansiya sərnişinlərin istifadəsinə verilib. Bu gün Bakı Metropoliteninin mövcud xətlərinin uzunluğu 36,63 kilometr olmaqla, 3 xətt üzərində yerləşən 25 stansiyadan, 1 elektrik deposundan və idarə aparatının da yerləşdiyi texnoloji korpusdan ibarətdir. Gələcəkdə Bakı Metropoliteni xətlərinin sayının 5-ə, şəbəkənin uzunluğunun 119 kilometrə, stansiyaların sayının isə 76-ya çatdırılması nəzərdə tutulur.
Türkiyədə 12 Sentyabr Hərbi Çevrilişindən sonra xalq 1983-cü il 6 noyabr tarixində ilk dəfə seçkilərə getdi. 12 Sentyabr hökumətinin icazə verdiyi 3 partiyanın yarışdığı parlament seçkiləri böyük bir sürprizlə nəticələndi: Turqut Özalın sədri olduğu Ana Vətən Partiyası Türkiyə Böyük Millət Məclisinə (TBMM) 211 millət vəkili çıxararaq təkbaşına iqtidarı qazandı. Xalqçı Partiya 117, 12 Sentyabr hərbi hökumətinin dəstəklədiyi Turqut Sunalpın sədri olduğu Milliyyətçi Demokratiya Partiyası isə 71 millət vəkili əldə edə bildi.
6 noyabr 1985-ci ildə Kolumbiyada hökumət əleyhinə olan fəallar paytaxt Boqotadakı Ədliyyə Sarayını basdılar. Təhlükəsizlik qüvvələri və nümayişçilər arasında çıxan qarşıdurmada, 11-i ali hakim olmaqla, 115 nəfər həyatını itirdi.
2009-cu il 6 noyabr tarixində Xalq Yazıçısı Qılman İlkin vəfat edib (1914-2009). “Qalada üsyan”, “Şimal küləyi”, “Hədiyyə” və digər povestlərin müəllifidir. "Kölgələr sürünür", "Yenilməz batalyon" bədii filmlərinin və bir neçə televiziya filminin ssenarisini yazıb. "Azərbaycan" jurnalının baş redaktoru, "Uşaqgəncnəşr", "Azərnəşr" nəşriyyatlarının direktoru vəzifələrində işləyib.
