Təxminən bir il bundan əvvəl aymediacompany.az saytının əməkdaşları ilə vətən müharibəsi şəhidlərinin Neftçala rayonunda keçirilən tədbirlərinin birində iştirak edirdik. Tədbirdə şəhid analarının qarşısında çıxış etmək üçün gənc bir qıza söz verildi. Ətrafda hər kəs söhbət edirdi. Elə ki, gənc qızımız danışmağa başladı, sözləri ilə ahəngi, səsi ilə fortepianosunu elə idarə etməyə başladı ki, istər istəməz ətrafa sakitlik çökdü və ətrafdakı insanlar qızın çıxışını dinləməyə başladı. Bəlkə də mənəvi kasıblıq çəkən adamları belə öz natiqlik bacarığı ilə ələ ala bilən, üstün elmi, mimikaları, sözünün kəsəri və əsası, dərin söz ötürücülüyü qabiliyyəti və insana verdiyi yüksək müsbət enerjisi ilə elə cəlb etdi ki, belə səssizlik həyatımızın heç bir yerində qarşımıza çıxmamışdı və hər kəs tam diqqətlə bu qızın danışdığı mövzulara köklənmişdi. Düzü bir mədəniyyət və media işçisi kimi regionlarımızda belə savadlı, kütləni ələ almaq və natiq danışıq tərzi olan gəncə az rast gəldiyimi gizlədə bilmərəm. Odur ki, ətrafdakılara bu qızın kimliyi haqqında soruşdum mənə bildirdilər ki, bu gənc xanım vətən müharibəsində qəhrəmanlıqla şəhadətə ucalan Neftçala şəhidi Orucov Xalidin bacısı Sevinc Salehqızıdır. Bu odlu – alovlu çıxışdan sonra fəxarət hissimi və riqqətimi gizlədə bilməzdim. Mərasimdən sonra isə xanım qızın getdiyini bildirdilər, görüşmək imkanımız olmadı. Bir müddətdən sonra saytımızın Facebook səhifəsində bu xanımın bizim saytımızın vəsiqəsi boynundan asılı bir çıxış videosu qarşıma çıxdı. Dərhal baş redaktorumuz Almaz Yaşarı yığdım və bu qızımızın bizimlə əməkdaşlıq etdiyini soruşdum. Almaz xanım bildirdi ki, bu çox fitri istedad və talant sahibi qızımız bizim saytımızın bölgə müxbiri vəzifəsinə yenicə təyin olunub. Saytımızın adına çox sevindim və saytımızın vatsap qrupuna əlavə olunduqdan sonra Sevinc qızımızla birgə çalışmağa, gündəmi və hadisələri müzakirə etməyə başladıq. Həqiqətən, bu gənc yaşda siyasətçilərə məxsus analitik qabiliyyət, yüksək mədəniyyət, sözlərlə oynamaq bacarığı, məntiqə əsaslanan hər yazdığı məqalədə sanki qələmində filoloq bacarığı olan Sevinc qızımız hər dəfəsində məni hadisələrə yanaşma və baxış bucağı ilə təəcübləndirir və mən bu gənc qızdan nələrisə öyrənirəm desəm yalan olmaz. Atalarımızın bir sözü var, ağıl yaşda deyil, başdadır. Bəlkə də oxucularımızda bir təsəvvür yarandı ki, Sevinc xanım olğun yaşda bir mətbuat nümayəndəsidir. Xeyir, elə bu il saytımızın ən gənc nümayəndəsi 14 iyun 2024-cu ildə 11 il təhsil aldığı, Neftçala rayonu Aşağı Surra kənd tam orta məktəbindən məzun olur və biz də aymediacompany.az ailəsi olaraq qızımızın “Son zəng” tədbirində iştirak etməyi özümüzə borc bildik. Keçirilən son zəng tədbirində təhsil ocağının rəhbərliyi və Neftçala rayon rəhbərliyi, o cümlədən, Neftçala rayonu təhsil sektoru rəhbərləri, şəhid anaları çıxış edərək məzunlara gələcək həyatlarında uğur və müvəffəqiyyət arzu etdilər. Tədbirdə diqqətimi çəkən bir məqam vardı, Neftçala şəhidimiz Xalid Orucovun uyuduğu müqəddəs məzarı məktəblə üzbəüz idi. Tədbirin aparıcısı da elə məhz Aymedicompany.az - ın bölgə müxbiri Sevinc Salehqızı idi, hansı ki, şəhid Xalidin bacısı. Sevincin qardaşı haqqında danışdığı xatirələrindən biri yadıma düşdü. Şəhid Xalidimizin böyük arzularından imiş bacısının son zəngində iştirak etmək, lakin canını vətənə qurban verən Xalidin bu arzusu həyata keçmədi, ancaq Sevinc üçün orda onlarla Xalidlər var idi. Qardaş məzarı ilə üz-üzə durub danışmaq əlbəttə ağırdır. Sözlər boğazında düyünlənir, bəzən danışmaqda çətinlik çəksə də usta danışıq qabiliyyəti, sözlərlə oynamaq, vəziyyəti ələ almaq bacarığı ilə tədbirin gedişini səngitmədən sona çatdırdı. Biz Sevinc xanımın gələcək həyatında azad bir media işçisi kimi fəaliyyət göstərib göstərməyəcəyini deyə bilmərik, ancaq biz bir ailə olaraq Sevinc Orucovaya yalnız bu çox çətin və çətin olduğu qədər də şərəfli peşəsində uğur və müvəffəqiyyət arzu edirik. Həyatın axışı səninlə olsun şəhid Xalidin yadigarı,irəlidəki həyatında yalnız zirvələr fəth etməyi sənə arzu edirik.