Pirallahıda "AYMEDİACOMPANY.AZ" saytının təşkilatçılığı ilə Vətənə sədaqəti, qəhrəmanlığı ilə seçilən Leytenant Tural Cahangirovun mövlud gününə həsr olunmuş "Şərəflə yaşayıb iz qoyanlar unudulmaz" adlı xatirə tədbiri keçirildi.
Bu mövlud tədbiri onun şərəfli xidmət yolunu yad etməyə, gənc nəsilə qəhrəmanlıq ruhunu aşılamaya xidmət edir.
Xatirə tədbirində dövlət qurumlarının nümayəndələri, Şəhid ailələri, Qazilər, hərbi qulluqçular, ictimaiyyət nümayəndələri və media təmsilçiləri iştirak etdilər.
Tədbiri giriş sözü ilə açan Pirallahı Rayon İcra Hakimiyyəti başçısının müavini Zülfiyyə Məmmədhüseynova, şəhidimizin həyat yolundan və qəhrəmanlığından danışaraq, dövlətimizin şəhid ailələrinə göstərdiyi diqqət və qayğıdan bəhs etdi.
Daha sonra 168 saylı tam orta məktəbin 2-ci sinif şagirdləri, içərisində şəhidimizin qızı Fatimənin də yer aldığı xüsusi kompozisiya ilə çıxış etdilər. Balaca Fatimənin atasına həsr etdiyi şeir zalda duyğulu anlar yaşatdı.
Antiterror Şəhidi Əli Babazadənin anası – Dilbər xanım, şəhid analarının duyğularını bölüşərək, Vətən uğrunda can verən oğullarımızın ailələrinin hər zaman dövlətin və xalqın yanında olduğunu vurğuladı.
Şəhidimizin komandiri Fəxrəddin Cavadov Tural Cahangirovun xidmət və döyüş yolundan danışdı, onun əsgərləri üçün necə nümunəvi bir hərbçi olduğunu xatırlatdı.
Pirallahı Ağsaqqallar Şurasının sədri Əli Kərimli və Pirallahı Həmkarlar İttifaqının sədri Arzu Abdullayeva öz çıxışlarında Şəhidin ailəsinə başsağlığı verdilər və şəhidlərin cəmiyyətimizdəki yerindən bəhs etdilər.
Tədbirdə həmçinin, Əməkdar jurnalist və Qarabağ veteranı Əntiqə Qonaq, Qərbi Azərbaycan İcması Xəzər rayon nümayəndəliyindən Fazilə Məmmədova və Etibar Ələsgərli də çıxış edərək şəhidimizin igidliyindən və Azərbaycan ordusunun gücündən danışdılar.
Daha sonra ilahiyyatçı Hacı Cavid, Şəhidlərin Allah qatındakı uca məqamı haqqında ürəkdən gələn fikirlərini bölüşdü.
Tədbirdə bədii hissə də olduqca təsirli anlarla yadda qaldı. Məddah Pərviz Hüseyninin şəhidlərə həsr etdiyi qəzəllər və oxuduğu məddahilər, Məddah Arazın “Şəhid balam” mahnısı mərasim iştirakçılarını kövrəltdi.
Bədii qiraətçi Samir Cəbrayıllı şəhidlərə həsr olunmuş şeirlər səsləndirərək mərasimi daha da emosional etdi.
Musiqili hissədə isə tanınmış müğənnilər Mirəli Cavadov, bəstəkar-müğənni Yaqut Almaz, eləcə də bəstəkar Ruslan Səfəroğlunun şəhid Tural Cahangirova ithaf etdiyi xüsusi mahnı səsləndirildi.
Tədbirin sonunda bütün iştirakçılar Şəhidimizin ailəsinə, xüsusilə də onun balaca övladlarına dəstək olduqlarını bir daha ifadə etdilər.
"Şərəflə yaşayıb iz qoyanlar unudulmaz" adlı tədbirimiz, Tural Cahangirovun müqəddəs xatirəsinin hər zaman Azərbaycan xalqının qəlbində yaşayacağını bir daha sübut etdi.
[b]Fərid Əmiraslanov
"AYMEDİACOMPANY.AZ" mədəniyyət işləri üzrə direktor müavini
