Bu gün "Sabunçu Gənclər Evi"ndə 44 günlük Zəfər tariximizi yazan daha bir igid Vətən oğlunun - evin tək oğlu, Füzuli döyüşlərinin 19 yaşlı Şəhidi Nəsirov Əfqan Ramil oğlunun "Dəmir Yumruq Alfa-A" cəmiyyətinin təşkilatçılığı ilə mövlud tədbiri keçirildi. Tədbirdə Şəhid Anaları, Qazilərimiz, l, ll Vətən müharibəsi iştirakçıları, millət vəkilləri- Aydın Mirzəzadə, Jalə Əhmədova, Könül Nurullayeva, Aydın Hüseynov, Dövlət Gömrük Akademiyasının rəisi Qulu Novruzov, "Dayaq Vətən Müharibəsi Əlillərinə və Şəhid Ailələrinə dəstək" təşkilatının sədri Qalib Əliyev,
Xüsusi Təyinatlı, Qarabağ qazisi polkovnik- leytenant Hikmət Ağayev, Hüseynov Qüdrət Rahim oğlu
QHT lər, KİV nümayəndələri və fəxri qonaqlar iştirak edirdilər.
Əvvəlcə Vətənimizin suverenliyi uğrunda şəhid olan oğullarımızın ruhu bir dəqiqəlik sükutla yad edildi. Azərbaycan Respublikasının Dövlət Himni səsləndirildi.
"Dəmir Yumruq Alfa-A" cəmiyyətinin sədri Ülviyyə xanım Əsədova tədbiri açaraq Allahdan bütün şəhidlərə rəhmət dilədi.
"Hər bir xalqın tarixində mürəkkəb və keşməkeşli günləri olub. Azərbaycan 1991-ci ildə müstəqilliyini bərpa edərək azad oldu. Ancaq müstəqilliyimiz müharibə dövrünə düşdü. Birinci Qarabağ müharibəsi hər birimizin ağrılı yeri oldu. Həmin döyüşlərdə minlərlə vətəndaşımız şəhid oldu. Onlar şəhid olsalar da, adlarını qəhrəmanlıq tariximizə böyük hərflərlə yazdılar.
Əfqan Nəsirov kimi igid döyüşçülərimizin Vətən sevgisi sayəsində 30 ilə yaxın davam edən işğala son qoyuldu, Vətən müharibəsi qələbə ilə yekunlaşdı".
Şəhidin anası Kəmalə İsmayılova dedi ki, Əfqan hər zaman Vətənə bağlı olmuşdur. O, şərəflə döyüşərək torpaqlarımızın azadlığı uğrunda canından keçdi. Belə qəhrəman oğulun anası olduğum üçün fəxr edirəm.
Çıxış edənlər Şəhidlərimizin, Qazilərimizin qəhrəmanlığından söz açdılar. Ali baş komandanın rəhbərliyi ilə müzəffər ordumuzun qalibiyyətlərindən fəxrlə danışdılar.
Tədbirin sonunda qəhrəmanlığı, igidliyi tərənnüm edən şeirlər, vətənpərvərliyə həsr olunan musiqilər səsləndirdilər.
Şəhidin anasına diplomlar təqdim olundu.
2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan Vətən müharibəsi zamanı Əfqan Nəsirov Füzuli döyüşlərində savaşıb. Oktyabrın 12-si Füzulidə şəhidlik zirvəsinə ucalıb. Əfqan Nəsirov Zabratda torpağa tapşırılıb.
Azərbaycanın ərazi bütövlüyünün təmin edilməsi uğrunda qoyulmuş tapşırıqların icrası zamanı verilmiş tapşırıqları şərəflə yerinə yetirdiyi üçün Azərbaycan Prezidenti İlham Əliyevin Sərəncamınlarına əsasən Əfqan Nəsirov şəhadətindən sonra "Vətən uğrunda", "Füzulinin azad olunmasına görə" və "Cəsur döyüşçü" medalları ilə təltif edilib.
Ruhun şad, mövludun mübarək, İgid!
"AY MEDİA COMPANY".az
"Dəmir Yumruq Alfa-A".az
