İsveçin Yöteborq şəhərində yerləşən “Dalheimers” evinin konfrans zalında “Azərbaycan qadınlarının cəmiyyətdə unikal rolu” mövzusunda ədəbi-bədii gecə keçirilib. 
İsveçdə fəaliyyət göstərən “Qobustan-Azərbaycan Aydınlar Ocağı”nın təşkilatçılığı ilə baş tutan tədbirdə soydaşlarımız və yerli ictimaiyyətin nümayəndələri iştirak ediblər. 
Azərbaycanın “Sarı gəlin” xalq mahnısı  və rəqsi ilə başlayan tədbirin moderatoru  və əsas məruzəçisi qismində “Qobustan-Azərbaycan Aydınlar Ocağı”nın sədri, Yöteborq Universitetinin dosenti Səadət Kərimi çıxış edib. 
Qadınlarımızın statusundan danışarkən məruzəçi nəzərə çatdırıb ki, Azərbaycan müsəlman Şərqində qadınlara seçmək və seçilmək hüququ verən ilk dövlətdir. Azərbaycanda ilk qadın xeyriyyə cəmiyyətinin 1908-ci ildə yaradıldığı vurğulanıb. Bildirilib ki, Azərbaycan qadınları ölkə tarixinin bütün dövrlərində, o cümlədən Qarabağ müharibələri zamanı xalqın taleyüklü məsələlərinin həllində böyük rol oynayıblar. 
Sonra  Azərbaycan ədəbiyyatının və mədəniyyətinin inkişaf tarixində silinməz iz qoymuş dörd qadın ədibin – Xurşidbanu Natəvan, Əzizə Cəfərzadə, Mədinə Gülgün və Hökümə Billurinin həyat və yaradıcılığı barədə ətraflı məlumat verilib. Şuşada yaşayan Qarabağ xanının qızı Natəvanın öz yaradıcılığı ilə bu bölgədə maarifçilik missiyası yerinə yetirdiyi, Əzizə Cəfərzadənin əz əsərləri ilə sovet ideologiyasının milli dəyərlərimizə vurduğu zərbəni ifşa etdiyi, Azərbaycanın iki yerə parçalandığını xalqımıza çatdırmağa çalışdığı, Mədinə Gülgün və Hökümə Billurinin Cənubi Azərbaycan probleminə, 1945-1946-cı ildə Cənubi Azərbaycanda Milli Hökümətin qurulması və süqutuna, xalqımızın dəfələrlə deportasiyalara məruz qaldığına diqqəti cəlb etdiyi vurğulanıb.  
Tədbirin bədii hissəsində Səadət Kəminin tərcüməsində şeir və ədəbiyyat parçaları təqdim edilib. Soydaşlarımız Türkay Arifqızı, Elmira Rəhbər və Ülviyyə Nəcəfovanın ifasında Xurşidbanu Natəvanın  3 şeiri, Əzizə Cəfərzadənin “Bakı-1501” romanından bir parça, Mədinə Gülgünün “Sən gəlməz oldun” və Hökümə Billurinin “Təbriz” şeirləri Azərbaycan, ingilis, isveç dillərində məharətlə səsləndirilib, “Sən gəlməz oldun” və “Təbriz” şeirlərinə yazılmış mahnılar təqdim olunub. Bu, tədbir iştirakçılarının böyük marağına səbəb olub. 
Proqramın sonunda Azərbaycanın Milli Qəhrəmanları Salatın Əsgərova və Gultəkin Əsgərovanın, eləcə də 2022-ci ilin payızında İran rejiminə qarşı mübarizədə həyatlarını itirən cənubi azərbaycanlı qadınların əziz xatirəsi ehiramla anılıb.