Soyqırımı Memorial Kompleksi tərəfindən 1918-ci il azərbaycanlılara qarşı törədilmiş soyqırımı hadisələri və “Mədəni irsimiz: dünən və bu gün” mövzusunda təqdimatlar əsasında Bakı şəhərinin bir sıra təhsil müəssisələrində tədbirlər və sərgilərin təşkil olunmasına başlanılıb. Belə ki, 176 nömrəli tam orta məktəbdə, İlqar İbrahimov adına 167 nömrəli tam orta məktəbdə və Məmməd İsmayıl oğlu Cuvarlinski adına 52 nömrəli tam orta məktəbdə layihə üzrə tədbirlər təşkil olunub.Tədbirlərdə Kompleksin əməkdaşları Abutalib Turabov və Xəyal Nuhbalayev çıxış edərək şagirdlərə və pedaqoji kollektivin üzvlərinə soyqırımı hadisələri barədə ətraflı məlumat veriblər. Çıxışlarda xalqımızın tarixi boyu məruz qaldığı soyqırımı və etnik təmizləmə siyasətinin kökləri, bu siyasətin törətdiyi faciələr, günahsız insanların kütləvi şəkildə qətlə yetirilməsi, doğma yurdlardan didərgin salınması və maddi-mədəni irsimizin məhv edilməsi geniş şəkildə işıqlandırılıb. Qeyd olunub ki, Quba şəhərində aşkar edilmiş kütləvi məzarlıq həmin qanlı hadisələrin bu gün də mövcud olan canlı şahididir və tarixi həqiqətlərin gələcək nəsillərə çatdırılmasında mühüm rol oynayır. Çıxışlarda həmçinin mədəni irsimizin dünəni və bu günü barədə də söhbət açılıb. Məlumat verilib ki, düşmən tərəfindən işğal olunmuş ərazilərdə tarixi və dini abidələrimiz, məscidlərimiz, ziyarətgahlarımız, muzey və kitabxanalarımız dağıdılıb, talan edilib. Bununla yanaşı, işğaldan azad olunmuş ərazilərdə dövlət qayğısı ilə həyata keçirilən genişmiqyaslı bərpa və quruculuq işləri, dağıdılmış abidələrin yenidən qurulması, mədəni irsimizin qorunması və gələcək nəsillərə çatdırılması istiqamətində görülən tədbirlər şagirdlərə izah olunub.Məktəblərdə təşkil edilən sərgilərdə isə soyqırımı hadisələrini əks etdirən arxiv materialları, fotoşəkillər və tarixi sənədlər nümayiş olunub. Şagirdlər sərgi ilə yaxından tanış olaraq maraq göstəriblər, əməkdaşlara mövzu ilə bağlı suallar ünvanlayıblar. Tədbirlərin sonunda çıxış edən ümumtəhsil müəssisələrin rəhbər şəxsləri gənc nəslin tarixi yaddaşının qorunmasının, milli-mənəvi dəyərlərə sayğının və vətənpərvərlik tərbiyəsinin əhəmiyyətini vurğulayıblar. Bildirilib ki, tarixi həqiqətlərin təbliğ olunması, soyqırımı faciəsinin unudulmaması və mədəni irsimizin qorunması hər bir vətəndaşın borcudur.
Keçirilən tədbirlərdə ümumilikdə mindən artıq şagird maariflənmişdir.
"AYMEDİACOMPANY.AZ"
