Bu gün dünyamızı varlıqları ilə gözəlləşdirən, gülüşləri ilə rəngləndirən uşaqların günüdür. Təkcə bir günü yox, hər günü onlar üçün bayram kimi keçirək. Onları sevək, qayğıdan, diqqətdən kənar qoymayaq. Vətənpərvər, savadlı, dünyagörüşlü, humanist, mərhəmətli insan kimi böyüməsi üçün əlimizdən nə gəlirsə edək.
"Ədalət və Qanunlar" xəbər səhifəsi xəbər verir ki, 1 iyun 1950-ci ildə BMT Baş Assambleyası tərəfindən "UŞAQLARIN BEYNƏLXALQ MÜDAFİƏSİ GÜNÜ" kimi qeyd olunması qərara alınıb.
Həmin gün təşkil olunan "Qadınların Beynəlxalq Konfransında" uşaq hüquqlarının təmin edilməsi ilə bağlı təkliflər səslənib və elə həmin tədbirdə də 1 iyun tarixini uşaqların beynəlxalq müdafiəsinə həsr etmək qərarı verilib. Bundan sonra iyunun 1-i Uşaqların Beynəlxalq Müdafiəsi Günü kimi tarixə düşüb. Dünyanın əksər ölkələrində olduğu kimi, bu gün Azərbaycanda da qeyd edilir.
Azərbaycan Respublikasının Prezidenti İlham Əliyev, Azərbaycan Respublikasında uşaqlara dövlət qayğısının gücləndirilməsi, uşaq problemlərinə vətəndaş cəmiyyəti qurumlarının diqqətinin artırılması və ölkənin uşaqlarla bağlı demoqrafik perspektivlərinin müəyyənləşdirilməsi məqsədi ilə 22 dekabr 2008-ci il tarixində sərəncam imzalamışdır. Sərəncama görə 2009-cu il "Uşaq ili" elan olunmuşdur.
"Dəmir Yumruq" Alfa-A Cəmiyyəti 1 iyun tarixində, "Uşaqların Beynəlxalq Müdafiəsi" günü münasibəti ilə Şəhid və Qazi övladlarının şanına yaraşacaq tərzdə tədbir təşkil etmişdir.
Tədbir "Mirana Palace" restoranında təşkil edilmiş və tanınmış müğənnilər dəvət olunmuşdu.
Tədbiri giriş sözü ilə "Dəmir Yumruq Alfa-A Cəmiyyəti"-nin sədri Ülviyyə xanım Əsədova açdı.
Ülviyyə xanım Əsədova çıxışı zamanı bildirdi ki; "Hər bir şəhid ailəsi və övladları, hər bir qazi və övladları Azərbaycan Prezidenti İlham Əliyevin, Birinci vitse-prezident Mehriban xanım Əliyevanın və Azərbaycan dövlətinin daim diqqətindədirlər."
Şəhid və Qazi övladlarını sevindirmək məqsədi ilə onlara hədiyyələr təqdim olundu. Rəngarəng musiqi nömrələri, uşaqların sevimli nağıl qəhrəmanlarının bir birindən maraqlı şou səhnələri uşaqların sevincinə səbəb oldu.
Tədbirdə KİV nümayəndələri, Şəhid anaları, Şəhid xanımları, Qazilər, ziyalılar, idmançılar da iştirak etmişdir.
Dahi Heydər Əliyev uşaqlar haqqında belə demişdir: “Uşaqlar bizim gələcəyimizdir, gələcəyimizi nə cür tərbiyə edəcəyiksə, ölkəmizin, millətimizin, dövlətimizin sabahı bundan asılı olacaqdır”.
"Dəmir Yumruq" AIFA-A Cəmiyyəti ailəsinə, bu gün münasibətilə ŞƏHİD və Qazi övladları üçün "Mirana Palace" restoranında maraqlı və əyləncəli tədbir təşkil etdiyi üçün öz təşəkkürümüzü bildiririk.
Bayramınız mübarək əziz körpələr!
Yaxşı ki, varsınız! Sizi çox sevirik. Bütün uşaqlara sülh, əmin-amanlıq, firavanlıq arzulayırıq.
"AYMEDİACOMPANY"
