Hər bir millətin milli mənəvi dəyərləri, mədəniyyəti, incəsənəti bəşəriyyətdə xalqların tarixdə qalma müqəddaratını həll edir.

Millətlərin aydınları, ziyalıları, elm adamları xalqların millət kimi formalaşmağında əsas rol oynayır. Bəzən ziyalılar cəmiyyətə qarşı bitkinlik sindromunun təsiri altında laqeyd münasibət bəsləyəndə, cəmiyyətin mənəvi dəyər balansı mənəviyyatdan maddiyyat səviyyəsinə düşür və pozulur. Dünyanı saxlayan elə tarazlıq deyilmi?! Balans pozulanda hər şey pozulur, yolunda getmir. Müasir dünyamızın ən aktual mövzularından biri sosyal şəbəkələrdir. Hansı ki, insanların bir çox hissəsi televiziyaya baxmadan bütün informasiyaları mobil telefon vasitəsilə internetdən asanlıqla əldə edirlər. Saysız hesabsız informasiyalarla dolu olan sosyal aləm hər zaman düşündüyümüz kimi informasiyaları əlçatan edən, işimizə yarayan müsbət məhfumlardan ibarət deyil. Pis tərəflərini düşünməmək onsuz da bizə ötürülən mənfi informasiyaların beynimizdə formalaşdırdığı sosyal aləmin bir qalxanıdır. Hər birimiz sosyal şəbəkələrdən fərqli məqsədlərlə istifadə edirik. Qarşımıza çıxan gündəlik minlərlə informasiya həmişə zehnimizə müsbət təsir göstərmir. Şüuraltımızda cəmləşən bu məlumatlar xarakterimizə təsir edir.

"Tiktok" sosyal şəbəkəsi internet platformasında ciddi qəbul edilməsə də, kütlənin tələbatı olan böyük bir sosyal platformadır. Bəzən insanlar buradan müəyyən yüksək qazanclar əldə edirlər. Ancaq yaşadığımız ölkəmizin gəncliyini həqiqətən də sosyal platformanın canlı videolarında bu halda görmək müqəddəratımızı həll edən gəncliyimizin bir çox hissəsini dəyərlərimizdən çox uzaqlaşdıraraq, əslində, uçuruma aparır. Təhqir, heç bir cəmiyyət içində tərbiyyə, ədəb normalarına uyğun olmayan söhbətlər, qeyri-etik davranışlar və görüntülər bu platformanın əsas prinsipi halına gəlib sanki. Elə bil hər hansı bir qazanc naminə insanlar fərqlənmək, insanların diqqətini çəkmək və pul qazanmaqçün bütün şəxsiyyətlərini, mənəviyyatlarını,insan kimi bəzən ağır da olsa ləyaqətlərini ayaqlar altına sərirlər. Cəmiyyətə, gəncliyimizə pis örnək olan dırnaqarası fenomenlərin meydan sulamasında və kütləni arxalarınca aparmasında ziyalılarımızın, aydınların laqeydliyi və kütlənin elmsizliyi dayanır. Sanki kimlərsə sivilizasiya və modernlik adı altında gəncliyimizi 3-5 manat fərqlənib pul qazanmaq uğrunda mənəvi uçuruma aparır. Bəzən yaşlı insanların yüngül hərəkətləri bu simptomun ahıl insanlara da bulaşdığını bizə göstərir. Axı ağsaqqal yaşında bir insanı nə məcbur edirki, yüngül hərəkətlər eləsin diqqət çəkmək xatirinə. Axı böyüklər heç olmaya davranışları ilə örnək idi. Hələ bunun bir də izləyici kütləsi var. Bəzən ağır ifadə olsa da, söyləməyə məcbur olacağımız bir dərd də yüngül həyat tərzi keçirən insanlara onlayn atılan hədiyyə pullardır. Bu qədər Şəhidi, Şəhid ailəsi, xəstəsi, problemli insanı olan məmləkətdə yaraşırmı bizə millət olaraq belə “adam”lara dəstək olaq?! Biz niyə kütlə olaraq bu vəziyyətə düşdük?? Təfəkkürümüzü, intellektimizi, ağı qaradan ayırmağa nə mane oldu, bilmədik?!! Cəmiyyət olaraq savadımız, intellektimiz, sahib olduğumuz yararlı bilgilərlə fərqlənməli deyilikmi?! Təfəkkür olaraq cəmiyyətimizə zəli kimi necə sızıb mənəviyyat qanımızı necə sorublarsa, artıq cəmiyyət aydınları olaraq müsbət işlərin təbliğat kampaniyasını başlatmaqda yarar var. Yoxsa bir gün ayılacayıq ki, gəncliyimiz tiktokda bitib və hərşeyin sonudur....

Fərid Əmiraslanov
2015 Respublika muğam musabiqəsinin diplomantı, Xanəndəlik üzrə musiqi müəllimi
"AY MEDİACOMPANY.AZ" mədəniyyət şöbəsinin müdiri