Şəhid Hüseynov Kamran Namiz oğlu 12 iyul 1995-ci ildə Neftçala şəhərində anadan olmuşdur. Uşaqlıq illərini doğulduğu Neftçala şəhərində keçirib. 2002-ci ildə E.Həbibov adına 4 saylı tam orta məktəbin 1-ci sinfinə getmişdir. 2011-ci ildə həmin məktəbi bitirib Cəmşid Naxçıvanski adına hərbi liseyə qəbul olub. 2013-cü ildə liseyi bitirdikdən sonra isə Heydər Əliyev adına Azərbaycan Ali Hərbi Məktəbinə daxil olub. 2017-ci ildə həmin məktəbi bitirib və "leytenant" hərbi rütbəsi verilib. 2017-ci ildə Xüsusi Təyinatlı Qüvvələrin 4 aylıq kursunda olmuşdur və XTQ zabiti olaraq xidmətə başlamışdır. Leytenant Kamran Hüseynov xidməti dövründə dəfələrlə təlimlərdə iştirak etmişdir. Silahlı Qüvvələrin Təlim və Tədris Mərkəzində 18.11.2019-cu il tarixdən 21.12.2019-cu il tarixədək fəaliyyət göstərən “kəşfiyyatçı artilleriya korrektəedici” ixtisası kursunu bitirmişdir. 05.03.2018-ci il tarixdən 13.04.2018-ci il tarixədək Ankaranın Gölbaşı şəhərində Genelkurmay Özel Kuvvetler Komutanlığında açılan 3-cü Dönem Uluslararası Askeri Serbest Paraşüt kursunda iştirak etmiş və müvəffəqiyyətlə başa vurmuşdur. 03.10.2022-ci il tarixdən 11.11.2022-ci il tarixədək Kayserinin Zincirdere şəhərində Kara Kuvvetleri Komutanlığı 1-ci Komando Tugay Komutanlığında 48-ci Dönem Statik Paraşüt Katlama ve Kullanıcı Bakımı Kursunu müvəffəqiyyətlə başa vurmuşdur. Hərbi xidməti zamanı fərqləndiyinə görə rəhbərlik tərəfindən dəfələrlə fəxri fərman və təşəkkürnamələrlə təltif edilmiş, baş leytenant hərbi rütbəsi verilmişdir.

Azərbaycan Ordusunun baş leytenantı olan Kamran Hüseynov Vətən müharibəsi zamanı Cəbrayılın, Xocavəndin, Kəlbəcərin və Şüşanın azadlığı uğrunda gedən döyüşlərdə iştirak etmişdir. Döyüşlər zamanı yaralanmış, lakin tam sağalmadan yenidən döyüş bölgəsinə qayıtmışdır və Vətən müharibəsindəki qələbədə pay sahibi olmuşdur.

Dəftərlərini, kitablarını, əl yazmalarını anasına tapşıran Şəhid baş leytenant Hüseynov Kamran dostunu xilas etdib geri qayıdan zaman ermənilərin basdırdığı minaya düşərək qəhrəmancasına şəhid olub. Şəhid Kamran Hüseynov 4 mart 2023-cü il tarixində Neftçala şəhər Şəhidlər Xiyabanında dəfn olunub.

Xidməti dövründə baş leytenant Hüseynov Kamran Namiz oğlu Azərbaycan Respublikası Prezidentinin 29.12.2020-ci il tarixli Sərəncamına əsasən "Kəlbəcərin azad olunmasına görə" medalı ilə, 24.06.2021-ci il tarixli Sərəncamlarına əsasən “İgidliyə görə”, "Cəbrayılın azad olunmasına görə", "Xocəvəndin azad olunmasına görə" və "Şuşanın azad olunmasına görə" medalı ilə, Azərbaycan Respublikası Prezidentinin adından Azərbaycan Respublikası Müdafiə nazirinin 0158t nömrəli 26.06.2018-ci il tarixli əmri ilə "Azərbaycan Ordusunun 100 illiyi" yubiley medalı ilə, 0184t nömrəli 03.11.2020-ci il tarixli əmri ilə “Şücaətə görə” medalı ilə, Azərbaycan Respublikasının Baş Naziri cənab Əli Əsədovun 21.04.2022-ci il tarixli Sərəncamına əsasən “Vətən müharibəsi iştirakçısı” medalı ilə təltif edilib.

Azərbaycan Respublikası Prezidentinin 25.06.2023-ci il tarixli Sərəncamına əsasən İgid döyüşçümüz Hüseynov Kamran Namiz oğlu Şəhadətindən sonra “Vətən uğrunda” medalı ilə təltif edilib.

04.03.2023-cü il tarixində Şəhadətə yüksələn Şəhid Hüseynov Kamranın Neftçala rayonunda il dönümü qeyd edilib. Şəhidimizin ata yurdunda ehsan süfrəsi açıldıqdan sonra məzarı ziyarət olunub. Tədbirdə "AYMEDİACOMPANY.AZ" xəbər saytının bölgə müxbiri, Şəhid ailələri, "Gündoğar" qəzetinin redaktoru, Neftçala rayon Heydər Əliyev mərkəzinin direktoru, Şəhidimizin döyüş yoldaşları, din xadimləri və bir sıra ziyalılar iştirak ediblər. Şəhidimizin ruhu şad olsun. Ailəsinə səbr diləyirik!

[center]