“Bütün ölkələr öz mənfəətlərini düşünür, lakin indi biz fərqliliklərimizə baxmayaraq, bir ölkə, bir vahid kimi düşünməliyik”.

Bunu “Misir xəyal fondu”nun prezidenti Məhəmməd Həqqaq Bizim.Media-ya açıqlamasında bildirib.

Məhəmməd Həqqaqın sözlərinə görə, onun komandası iqlim dəyişikliyinə qarşı elmi həllər təqdim edir:

“Ümid edirik ki, bu konfrans iqlim dəyişikliyinə qarşı mübarizədə bir dönüş nöqtəsi olacaq. Eyni zamanda, COP-un gündəliyində yoxsulluq və aclıq problemini həll etmək də olmalıdır, çünki aclıq çəkən insanlar iqlim dəyişikliyini həll etməyi düşünməyəcək. Dünyadakı bütün insanların birləşərək iqlim dəyişikliyi adlı "canavarla" mübarizə aparması lazımdır, çünki bu, insan tarixindəki ən böyük düşməndir.

QHT rəhbəri iqlim dəyişikliyi ilə mübarizə aparmaq üçün komandasının təqdim etdiyi həll yollarından danışıb.

“Biz elmi bir QHT-yik və iqlim dəyişikliyi üçün həllərimiz var. Bizim fikrimizcə, problem enerji əldə etmək üçün istifadə etdiyimiz alətlərdir. Çünki hazırda istifadə olunan mərkəzləşdirilmiş elektrik stansiyaları cəmi 10% səmərəliliklə işləyir, lakin bizdə 90% səmərəliliklə çalışan yeni yaşıl texnologiya var. Bu texnologiya həm daha az karbon qazı yayır və xərcləri 3,5 il ərzində geri qaytarır“.

Həmsöhbətimiz karbon dioksid emissiyasını azaltmaq üçün də üsullar tapdıqlarını deyib:

“Biz qida tullantılarından biometan qazı istehsal edirik, beləliklə, xərclər 2,5 ilə geri qayıdır. Bu texnologiyadan yararlanmaqla fosil yanacaqlardan çox az istifadə edəcəyik və CO2 emissiyasını əhəmiyyətli dərəcədə azaldacağıq. Həmçinin metan qazının yayılma problemini də həll edirik. İqlim dəyişikliyi yuxarı atmosferdəki istixana qazlarının təsirindən yaranır və bunun üçün də həllimiz var. Biz indi bir alət üzərində araşdırmalar aparırıq. Həmin alət istixana qazlarını atmosferin yuxarı təbəqəsindən alıb yerin cazibə qüvvəsindən kənara buraxır”.

“Misir xəyal fondu”nun nümayəndəsinin iqlim dəyişikliyində əhəmiyyətli rol oynaya biləcək ixtirası da var:

“Digər bir araşdırmamız isə kosmosda elektrik enerjisi istehsal edib onu işıq konsentrasiyası ilə birbaşa yerə ötürmə texnologiyasıdır. Bundan əlavə, bizim nümayəndəmiz çox səmərəli bir külək turbini ixtira edib. Bu turbin adi modellərdən 7 dəfə daha səmərəlidir və hazırda Misir əyalətləri arasında heç bir enerji doldurulmasına ehtiyac duymadan işləyən elektrik avtomobilinin üzərində sınaqdan keçirilir”.

Bizim.Media