Azərbaycan Respublikası Müdafiə Nazirliyi "Şəhidlər ölməz, Vətən bölünməz" silsilə tədbirlər keçirdir.
Növbəti anım tədbiri Müdafiə Nazirliyi nəzdində yerləşən Həzi Aslanov adına Ordu İdeoloji və Mədəniyyət Mərkəzində "AY MEDİA COMPANY"nin təşkilatçılığı ilə baş tutub. Anım tədbiri Vətən Savaşında qəhrəmancasına iştirak edərək şəhid olan Mustafalı Əlizamin, Mustafayev Rüfətin və Nəbiyev Nicatın keçdiyi ömür və döyüş yoluna həsr edilib. Tədbirdə şəhidlərin ailə üzvləri, yaxınları, ziyalılar, ictimai fəallar, jurnalistlər, hərbçilər, Vətən müharibəsi iştirakçıları, qazilərimiz, "AY MEDİA COMPANY" nin rəhbəri Almaz Yaşar, ATATV. AZ Xəbər Agentliyinin rəhbəri Rasafil Bayramov, Ruhi Hüseynov və müğənni Coşqun Cəfəri iştirak edib.
Anım tədbirin əvvəlində Vətən Savaşında şəhid olan igid övladların ruhu bir dəqiqəlik sükutla yad edilib, dövlət himni səsləndirilib.
Daha sonra tədbir iştirakçıları ardıcıllıqla çıxış edərək Vətən Savaşını Azərbaycan xalqının oyanış və mübarizə əzmi kimi qiymətləndirərək torpaqlarımızın işğaldan azad olunmasını 30 illik işğal tarixinin ən böyük qələbəsi kimi dəyərləndiriblər.
Çıxışçılar həmçinin anım tədbirinin qəhrəmanlarının keçdiyi ömür və döyüş yoluna nəzər salıb, onların Vətən uğrunda gənc yaşlarında imza atdığı şücaət və qəhrəmanlıqlarından bəhs ediblər. Bildirilib ki, şəhid 26 yaşlı Mustafayev Rüfət Zöhrab oğlu Sumqayıtda doğulub, ali təhsil alıb və Vətən Savaşında könüllü gedərək 2020-ci ilin 12 oktyabr tarixində Tərtər istiqamətində gedən döyüşlərdə qəhrəmancasına şəhid olub. Ölümündən sonra "Suqovuşanın,
Cəbrayılın işğaldan azad olunmasına görə medallarla təltif olunub. Əslən Beyləqan rayonundan olan
25 yaşlı Mustafalı Əlizamin Valeh oğlu da Vətən Savaşına könüllü qatılanlardan olub. 2020-ci ilin 21 oktyabr tarixində Hadrut istiqamətində gedən döyüşlərdə igidcəsinə həlak olub. Ölümündən sonra Cəbrayılın, Füzulinin və Xocavəndin işğaldan azad olmasına görə medallarla təltif olunub. İki övladı Vətənə əmanətdir. Nəbiyev Nicat Ramil oğlu da Vətən müharibəsinin unudulmaz qəhrəmanlarındandır. 2000- ci il doğumlu gənc şəhid Goranboydan Ağdama kimi döyüş yolu keçərək ömrünə Vətən savaşçısı kimi mübariz adı həkk etdirməyi bacarıb. Müharibə başlayan gündən döyüşlərdə iştirak edən Nicat Nəbiyev 2020-ci ilin 1 oktyabrında qəhrəmancasına şəhid olub. Ölümündən sonra medallarla təltif olunub.
Şəhidlər və onların keçdiyi şərəfli ömür yolundan bəhs edildikdən sonra sonda şəhidlərin ailə üzvlərinə "Fəxri Diplom" təqdim olunub və kollektiv şəkildə xatirə şəkli çəkdirilib.
Günel Sabirqızı
