Ağdamda Vətən müharibəsində şəhid olan əkiz qardaşlar - Allahverdiyev Nazir və Tacir Xasay oğlunun doğum günü onların Çullu kəndindəki qəbrüstü abidələri önündə qeyd edilib .
Tacir və Nazir Qardaşlar 2001-ci il aprelin 20-də Ağdam rayonunun Çullu kəndində anadan olublar .
Hər iki qardaş — Əsgər Nazir və Tacir Allahverdiyevlər Vətən müharibəsində şəhid olub. Hər ikisi Subay idi.
Azərbaycan Ordusunun əsgəri olan Tacir və Nazir Allahverdiyevlər 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan Vətən müharibəsi zamanı Füzulinin azadlığı uğrunda gedən döyüşlərdə savaşıblar.
Əkiz qardaşlar oktyabrın 24-də Füzuli döyüşləri zamanı şəhid olub. Ağdam rayonu Çullu kənd qəbristanlığında dəfn olunublar .
Çullu kənd qəbirstanlığına xeyli insan toplaşmışdı. Onları yad etməyə gələnlər arasında şəhidin ailə üzvləri, yaxınları, ölkənin digər bölgələrindən gələn şəhid ailələri, qazilər, Çullu və Quzanlı kənd orta məktəbin müəllim və şagird kollektivi, Ağdam rayon İcra Hakimiyyəti, rayonun digər idarə və təşkilatlarından gələn nümayəndə heyyəti, eyni zamanda Ağdam rayon sakinləri iştirak edirdilər.
Mərasimə yığışanlar şəhidlərin döyüş yolundan bəhs etdilər və onların necə qəhrəman olduqlarını vurğuladılar.
Sonda rayonun axundu şəhidlərin ruhuna dua oxudu. Daha sonra tədbir şəhidlərin böyüyüb boya başa çatdığı evdə ehsan mərasimi ilə davam etdi.
Qeyd edək ki, Şəhid qardaşlar Allahverdiyev Nazir və Allahverdiyev Tacir "Vətən uğrunda" (ölümündən sonra) və "Xocavəndin azad olunmasına görə" medalları (ölümündən sonra) ilə təltif ediliblər.
Vətən sağ olsun !
Maya Quliyeva
Ağdam rayonu
