Bərdə şəhəri “Şərqin qapısı” statusu ilə, tarixi - mədəni zənginliyi, ticarət mərkəzi ünvanı ilə həmişə seçilib. Bu günkü sayımızda da tarixən Tərtər çayının hər iki sahilində yerləşən Bərdənin qədim yaşayış məskəni kimi mədəni abidələrindən biri də bu günə kimi tarixini, qədimiliyini qoruyub saxlamış Tər-tər çayı üzərində olan körpünün qalıqlarıdır. Deyilənlərə görə, çay yatağını üç dəfə dəyişmişdir. Çünki, hazırda çayın yatağında üç körpünün qalıqları durur. Bu körpü tarixdə ”çox gözlü” körpü kimi məşhur olmuşdur. 16 gözdən ibarət, uzunluğu 170 metr, eni isə 5 metr olan bu körpü əhəng məhlulu ilə daşdan tikilmişdir. Birinci körpü VII əsrə, sonrakı X və XIV əsrə aid körpülərdir.
Tərtər çayı haqqında belə bir rəvayət var ki, Makedoniyalı İsgəndərin Dərbənd üzərinə hücumu zamanı Qafqaz dağları ətəklərindən keçərkən çayın sahilində gecələməli olur. Qəfil sel gəlir. Səhər məlum olur ki, sel əsgərlərin çoxunu aparıb. İsgəndər qəzəblənib deyib ki: “Ah Tərtər” yəni “Ah dəhşətli bəla”. O vaxtdan da çayın adı Tərtər adlandırılıb. Tarixi abidələrimiz bizim keçmişimiz, bu günümüz, gələcəyimizdir. Qoruyub saxlamaq hər birimizin borcudur. Çünki tarix elə mədəniyyətlər sivilizasiyası ilə yadda qalır.