Gənclik – həyatın ən coşğun, ən ümidverici çağlarıdır. O, baharın ilk çiçəyi, dalğaların sahilə çırpıldığı ən gur anıdır. Gənclik iradə və güc, sevgi və inam, mübarizə və qələbə deməkdir. Hər il 2 fevralda Azərbaycan gəncləri öz bayramlarını qeyd edirlər. Bu gün yalnız bir təqvim tarixi deyil, həm də gəncliyin cəmiyyətin inkişafındakı mühüm rolunu göstərən dəyərli bir məqamdır.

Gənclər – vətənin döyünən ürəyi, sabahın etibar etdiyi əllərdir. Onların arzuları yüksəklərə ucalan bayraq kimi qürurludur, düşüncələri parlayan ulduzlar kimi aydın və safdır. Azərbaycan gənci bu gün elm və texnologiyadan tutmuş incəsənət və idmana qədər bir çox sahələrdə uğurlar qazanır, bayrağımızı dünya səhnəsində dalğalandırır.

Ancaq bu günün sevincini qeyd edərkən, bizlərə bu azad həyatı, firavan sabahları bəxş edən qəhrəman gəncləri unutmamalıyıq...

Şəhid Gənclər: Bizim üçün Fəda Olunan Gənclik

Elə gənclər var ki, onların baharı heç vaxt çiçək açmadı, onların arzuları yarımçıq qaldı, ancaq özləri bir əbədi bahara çevrildilər – Vətən üçün, bizlər üçün...

Tarix şəhidlərimizin qanı ilə yazılıb. O qan ki, torpağımızı suvararaq ona müqəddəslik qatdı. O gənclər ki, sevginin ən ülvisini Vətənə bəxş etdilər, gözlərini sabaha deyil, şəhadətə açdılar. Onlar universitet auditoriyalarından, ailə evlərindən, arzularının qucaq açdığı yollardan ayrılıb döyüş meydanına atıldılar. Onların qanı torpağa düşdü, adları isə əbədiyyətə yazıldı.

Biz bu gün azad Azərbaycan göylərinin altında nəfəs alırıqsa, bu, şəhid gənclərimizin bizə qoyub getdiyi ən dəyərli mirasdır. Onların cəsarəti, fədakarlığı, inamı bizim yolumuza işıq saçır. Ruhunuz qarşısında baş əyirik, əziz şəhidlər! Siz gəncliyinizi fəda etdiniz ki, biz gəncliyimizi azadlıq içində yaşaya bilək. Sizin adınız tarixdir, qəlbimizdə isə əbədi yaşayacaqsınız!

Sevinc Salehqızı
AYMEDİACOMPANY.AZ