Danimarka astronomu Tixo Brae (Tycho Brahe) 1601-ci ilin bu günü 55 yaşında vəfat edib. Ulduzların ilk müasir kataloqu məhz Brau tərəfindən tərtib olunub. O, 1 saniyədən də az xətaya yol verməklə Yer ilinin vaxtını ölçüb. Tixo Braenin bu tədqiqatı ilə astronomiya tarixində yeni era başlanıb. (1546-1601)
13 oktyabr 1792-ci ildə ABŞ-da Ağ Ev binasının təməli qoyulmuşdur.
13 oktyabr 1827-ci ildə Rusiya-İran müharibəsi (1826-1828) gedişində Cənubi Azərbaycan torpaqlarına daxil olan rus qoşunları Təbrizi ələ keçiriblər. Bunun ardınca general İvan Paskeviçin qoşunları Ərdəbil və Urmiyanı da işğal ediblər. Ruslar işğalın coğrafiyasını genişləndirməklə gələcək sülh müqaviləsində maksimum üstünlük əldə etmək niyyəti güdürdülər.
13 oktyabr 1880-ci ildə Bakı-Sabunçu-Suraxanı xəttinin istifadəyə verilməsi ilə Azərbaycanda dəmir yolu nəqliyyatının əsası qoyulub. Prezident İlham Əliyevin 2005-ci il 7 oktyabr tarixli Sərəncamı ilə Azərbaycan dəmir yolunun yarandığı gün - 13 oktyabr “Dəmir yolu işçilərinin peşə bayramı günü” elan olunub.
13 oktyabr 1884-cü ildən İngiltərənin Qrinviç (Greenwich) rəsədxanasından keçən meridian 0 (sıfır) - dərəcə və beynəlxalq zaman qurşaqları üçün başlanğıc nöqtəsi olaraq qəbul edildi.
13 oktyabr 1905-ci ildə Türkiyənin Qalatasaray idman klubu yaradılmışdır.
1911-ci ilin 13 oktyabrında Trablusqarp Müharibəsində İtaliya ordusu tərəfindən Liviyanın Dərnə şəhəri işğal olundu.
13 oktyabr 1921-ci ildə Türkiyə, Rusiya və Cənubi Qafqazın üç sovet respublikası - Azərbaycan, Gürcüstan və Ermənistan arasında Qars müqaviləsi imzalanıb. Sənəd 1921-ci ilin martında Rusiya ilə Türkiyə arasında bağlanmış Moskva müqaviləsinin davamı idi. Qars müqaviləsində Moskva sazişinin Cənubi Qafqazla bağlı müddəaları dəqiqləşdirilib, Türkiyənin Azərbaycan, Gürcüstan və Ermənistanla sərhədləri müəyyənləşdirilib. Müqavilənin mühüm bəndlərindən biri Naxçıvanla bağlı idi. Sənəddə Naxçıvanın Azərbaycan ərazisi olduğu və Türkiyənin razılığı olmadan Naxçıvanın yurisdiksiyasının dəyişdirilməsinin yolverilməzliyi təsbitlənib.
13 oktyabr 1923-cü ildə Ankara Türkiyənin yeni paytaxtı elan edilib. Paytaxtın İstanbuldan Ankaraya köçürülməsi Mustafa Kamal Atatürkün təşəbbüsü idi. 1920-ci ildə Türkiyə Böyük Millət Məclisinin toplandığı və xalqın qurtuluş mücadiləsinin idarə olunduğu şəhər yeni Türkiyənin mərkəzi halına gəlmişdi. 29 oktyabrda yeni paytaxtda Türkiyə Cümhuriyyətinin qurulduğu elan edildi.
ABŞ prezidenti Ronald Reyqan (Ronald Reagan) və Sovet İttifaqının baş katibi Mixael Qorbaçov strateji nüvə silahlarının idarəsilə bağlı razılığa gələ bilmədikləri üçün 1986-cı ilin 13 oktyabrında R.Reyqan "Ulduz döyüşləri" layihəsindən imtina etməyəcəklərini açıqladı.
1975-ci ildən bəri davam edən Livan Vətəndaş müharibəsi 1990-cı ilin 13 oktyabr tarixində sona çatdı. 15 illik müharibənin nəticələri 230 min adamın ölümü, 350 min yaralı və 1 milyondan çox livanlı mühacir oldu.
Çilidəki mədən qəzasında yerin altında qapalı qalan 33 mədənçi 69 gün sonra – 13 oktyabr 2010-cu ildə sağ-salamat olaraq qurtarıldılar.
