Bu aylarda hərkəs tərəfindən tanınmış musiqiçi Bayram Bağırsoyun avtomobil qəzasında ailə üzvlərinin itirməsi ilə bağlı xəbərləri eşidib hərkəs sarsılmışdı. Lakin bu yaxın günlərdə baş vermiş hadisənin məhkəmə prosesi ilə əlaqədar musiqiçi Bayram Bağırsoyla əlaqə saxladıq və ötən məhkəmə prosesi ilə bağlı musiqiçidən məlumat əldə etdik. Məlumatı musiqiçinin dilindən olduğu kimi sizlərlə paylaşırıq.
Bayram Bağırsoy: 05-04-2023-cü il tarixdə Bakı Salyan yolunda anam Dilarə xanıma məxsus maşınla övladım Bayhan, dayım Elxan və qohumlarım Bakı istiqamətində, dayımın 40 mərasimindən gələrkən anamın maşınını dayım Elxan idarə edib. Maşında nasazlıq olub və dayım maşını yol kənarına çəkib, yolun tam kənarında maşını saxlayıb. Arxadan sürətlə gələn kamaz markalı maşının Əli adlı şoferi anamın, dayımın, oğlumun və qohumlarımın olduğu "Hundai Accent" markalı maşına arxadan çırpılıb- özü də yolun kənarında saxlayan maşına. Hadisə nəticəsində anam, oğlum və iki qohumum hadisə yerində sürücü məsuliyyətsiliyindən dünyasını dəyişdi. Belə hadisələr ilk deyil. Məlumdur ki, ölkənin avtomobil yollarında belə hadisələr olur və yüzlərlə insan belə sürücü məsuliyyətsizliyinin qurbanına çevrilir. Heç kim olacaqlardan siğortalanmayıb.Mən də avtomobil idarə edirəm, yollardayam. Musiqiçi olaraq ölkəmizin bütün regionlarına el şənliklərinə gedib gəlirəm, maşın sürürəm. Ancaq məsələ budur ki, mənim və ailəmin başına gələn bu hadisədə, qanunla məhkəmə tərəfindən bu hadisəni törədən sürücüyə verilən cəza, anasını və övladını itirmiş bir insan kimi sanki sinəmə ikinci bir dağı çəkdi. Lənkəran ağır cinayətlər məhkəməsində 4 nəfərin ölümü ilə nəticələnən qəzanı törədən sürücüyə məhkəmə cəmi 6 il həbs verdi. Nədir ki, sürücü veterandır. 1-ci instansiya məhkəməyə biz çağrılmadıq, qatıldığımız ikinci məhkəmədə hakim 6 il hökmü oxudu. İmkan da vermədilər biz də şahidlərimizi gətirək. Hər şey elə tələm-tələsik baş verdi ki, biz şahidlərimizi də məhkəməyə cəlb edə bilmədik. Mən şəhid və qazi ailələrinin həmişə məclislərində iştirak etmişəm. Yeri gəlib yardım da eləmişəm, imkan daxilində. Ancaq kamaz kimi yük maşınını aksesuarlarla bəzəyib qabağına “veteran” yazıb “tiktok” sosyal şəbəkəsində canlı video açıb, qəza törədəcək qədər yüngül xarakterə sahib olan bir adama, 4 nəfərin canını alan bir “sürücüyə” bu qədər cəzanın kəsilməsi mənə onsuz da sarsılmış həyatımda daha bir ağır dərd oldu. Axı, kim icazə verib ki, sən veteranlığından sui istifadə edib bu qədər insan həyatına məsuliyyətsizlik ucbatından son qoyasan?! Bu hadisənin baiskarına ömürlük həbs cəzası da verilsə, nə anam, nə balam geri qayıdası deyil. Ancaq heç olmaya haqq ilə cəza kəsilsəydi ürəyi dağlı bir ata, ana itirmiş bir övlad kimi heç olmaya ürəyim təskinlik tapardı. Bu hadisə olandan mən bir gecə rahat yata bilməmişəm. Səhərə qədər oturub bəzən ağlayıram günlərlə. Dözə bilmirəm, ALLAH heç kəsə belə dərd verməsin. Mən sizin saytınızın vasitəsilə Cənab prezidentimizə, dövlətimizin hüquq mühafizə orqanlarına, Daxili işlər naziri cənab Vilayət Eyvazova, Ədliyyə naziri Fikrət Məmmədova, Baş prakuror Kamran Əliyevə xahiş edirəm ki, bu məsələyə görə qanunla nəzərdə tutulan cəza tətbiq olunsun bu adama və bu işi nəzarətə götürsünlər. Çünki belə hadisələrə yol verən adam, 2-3 ildən sonra veteranlığından sui istifadə edib müəyyən qaydalarla cəzanın çəkilməyən hissəsindən müxtəlif yollarla azad olacaq, sabah da gedib bir başqasının ailəsini məhv edəcək. Ürəyimdə o qədər sözlər var, o qədər arzularım yarımçıq qaldı ki, sözlərlə ifadə edə bilmirəm. Ana, bala itgisini yalnız yaşayanlar bilər nələr çəkirəm. Övlad itirmək dünyada tayı-bərabəri olmayan ağır bir dərddir. Həyatımda bu hadisədən dolayı böyük bir boşluq yaranıb. Bəlkə də günahkara haqq edilən cəza kəsilsə, bir az təskinlik taparam. Ümid edirəm ki, səsimi dövlətimiz və aidiyyatı qurumlar eşidəcək.
"AYMEDİACOMPANY.AZ"
