Bakı Mühəndislik Universitetində (BMU) Azərbaycan dili və pedaqogika kafedrası və Azərbaycan Milli Elmlər Akademiyası (AMEA) Şərqşünaslıq İnstitutunun birgə təşkilatçılığı ilə Zəfər Gününə həsr olunmuş “Azərbaycan dili Zəfər dilidir” mövzusunda elmi seminar keçirilib.
Seminarın açılışında BMU-nun elm və innovasiya məsələləri üzrə prorektoru Ağasi Məlikov çıxış edərək Azərbaycanın tarixi Zəfərinin əhəmiyyətindən, Vətən müharibəsinin qələbə ilə nəticələnməsini şərtləndirən əsas amillərdən danışıb. Bildirilib ki, xalqımızın birliyi və həmrəyliyi, Müzəffər Ali Baş Komandan İlham Əliyevin qətiyyətli rəhbərliyi, Azərbaycan Ordusunun qəhrəmanlığı, şəhidlərimizin canı və qanı, qazilərimizin şücaəti bahasına əldə edilən bu Qələbə ölkəmizin beynəlxalq mövqeyini daha da gücləndirib, hərbi-siyasi qüdrətini və milli iradəsini bütün dünyaya nümayiş etdirib. Bu tarixi hadisə, eyni zamanda, milli kimliyimizin, mənəvi dəyərlərimizin və ana dilimizin ifadə imkanlarının təbliği baxımından da mühüm əhəmiyyət daşıyır.
BMU-nun Azərbaycan dili və pedaqogika kafedrasının müdiri Təranə Hacıyeva “Azərbaycan Zəfər dilini şərtləndirən amillər” mövzusunda məruzə ilə çıxış edib. Məruzədə Azərbaycan dilinin linqvopolitoloji aspektləri, Zəfər anlayışının dilimizdə ifadə formaları, eləcə də dilin tarixi və ictimai-siyasi proseslərlə qarşılıqlı əlaqəsi diqqətə çatdırılıb. Qeyd olunub ki, Vətən müharibəsi dövründə milli birlik, mübarizə əzmi, qələbə ruhunu ifadə edən söz və ifadələr dilimizin ictimai-siyasi leksikasını zənginləşdirib.
Sonra kafedranın baş müəllimi Rəhman Quliyevin “Zəfər dilimizin bədii ifadəsi” adlı məruzəsi dinlənilib. Məruzəçi Azərbaycan klassik və müasir ədəbiyyatından nümunələr gətirərək ana dilimizin bədii-estetik imkanlarını, milli duyğu və düşüncələrin ifadəsindəki zənginliyini diqqətə çatdırıb. Bildirilib ki, Azərbaycan dili xalqımızın tarixi yaddaşını, milli ruhunu, sevincini, kədərini və qələbə əzmini ifadə edən zəngin bədii vasitələrə malikdir. Çıxışın sonunda Azərbaycan dilinin bundan sonra da Zəfər, mədəniyyət və milli kimliyimizin dünyaya tanıdılması dili kimi öz mövqeyini qoruyacağına əminlik ifadə olunub.
Tədbir AMEA-nın Şərqşünaslıq İnstitutunun dosenti Sübhan Talıblının “Azərbaycan dilinin Zəfəri 44 gündə” mövzusunda məruzəsi ilə davam edib. Tarixi və ictimai-siyasi kontekstdə təqdim olunan məruzədə 44 günlük Vətən müharibəsinin Azərbaycan dilinin beynəlxalq informasiya məkanında təmsil olunmasına, milli həqiqətlərin dünyaya çatdırılmasına verdiyi töhfələrdən danışılıb. Azərbaycan dilinin coğrafi yayılma arealı və türk dilləri ailəsindəki mövqeyi ilə bağlı məsələlərə də toxunan məruzəçi dilimizin özünəməxsusluğunu və saflığının qorunmasının vacibliyini vurğulayıb. O, Azərbaycan dilində elmi və publisistik məqalələrin hazırlanmasının, tarixi həqiqətlərin və Zəfər tariximizin müxtəlif auditoriyalara çatdırılmasının əhəmiyyətini qeyd edib, bu istiqamətdə xüsusilə gənc nəslin üzərinə düşən vəzifələrə diqqət çəkib.
Seminar çərçivəsində BMU-nun “Riyaziyyat” ixtisası üzrə II kurs tələbəsi Aygün Qurbanovanın ifasında Xəlil Rza Ulutürkün “Ana dilim” şeiri səsləndirilib.
Müzakirələr və iştirakçıların suallarının cavablandırılması ilə davam edən seminarın sonunda Şərqşünaslıq İnstitutu tərəfindən Azərbaycan dili və pedaqogika kafedrasına bir sıra nəşrlər hədiyyə edilib.
