AYMEDIACOMPANY.AZ-ın jurnalisti Fəxri Nəsirli Bakı şəhəri, Qaradağ rayonu, Lökbatan qəsəbəsində olub. Jurnalist şəhid Fərid Quliyevin anası ilə görüşərək onun müraciətini dinləyib, həmçinin ərazidə yaşayan sakinlərlə söhbət apararaq mövcud problemləri yerində araşdırıb.
Şəhid Fərid Quliyevin adını daşıyan küçənin mövcud vəziyyəti sakinlərin ciddi narazılığına səbəb olub.
Şəhid anasının sözlərinə görə, oğlunun adını daşıyan küçə uzun müddətdir baxımsız vəziyyətdədir. O, məsələ ilə bağlı dəfələrlə yerli icra hakimiyyətinə müraciət etdiyini, lakin indiyədək problemin həlli istiqamətində konkret nəticə görmədiyini bildirib.
Ananın bildirdiyinə görə, küçənin abadlaşdırılması ilə bağlı Prezident Administrasiyasından müvafiq göstəriş verilsə də, həmin göstərişin icrası istiqamətində hələ də real addımlar atılmayıb.
Şəhid anası Prezident İlham Əliyevə və Birinci vitse-prezident Mehriban xanım Əliyevaya müraciət edərək oğlunun adını daşıyan küçənin vəziyyətinə diqqət yetirilməsini və problemin həllinə kömək göstərilməsini xahiş edib.
Ərazidə yaşayan sakinlər də jurnalist Fəxri Nəsirliyə öz narazılıqlarını bildiriblər. Onların sözlərinə görə, küçənin vəziyyəti ilə bağlı dəfələrlə müraciət edilsə də, indiyədək lazımi abadlıq işləri aparılmayıb. Sakinlər aidiyyəti qurumların əraziyə diqqət ayırmasını və problemin aradan qaldırılmasını istəyirlər.
Şəhidin adı küçəyə verilib. Bəs onun adını daşıyan küçənin abadlaşdırılması niyə bu qədər uzanır?
Məsələ ilə bağlı aidiyyəti qurumların mövqeyini öyrənməyə və açıqlamalarını dərc etməyə hazırıq. Ümid edirik ki, şəhid ailəsinin və sakinlərin müraciəti diqqətdə saxlanılacaq, problemin həlli istiqamətində müvafiq tədbirlər görüləcək.
Fəxri Nəsirli
"AYMEDIACOMPANY.AZ"
