"Məhəmməd Əmin Rəsulzadənin ideyası, şübhəsiz ki, türkçülük, tanrıçılıq, islamçılıq və çağdaşlıq əsasında meydana çıxan Azərbaycanızmdır. Onun yaratdığı dövlət özündə həm keçmişi, həm bu günü, həm də gələcəyi əks etdirirdi".
Bunu AMEA-nın Fəlsəfə və Sosiologiya İnstitutunun aparıcı elmi işçisi, fəlsəfə doktoru, türkoloq alim Faiq Ələkbərli "AYMEDİACOMPANY. AZ"a bildirib.
O, Məhəmməd Əmin Rəsulzadənin ideologiyasiyasından danışıb:
Məhəmməd Əmin Rəsulzadə demək Azərbaycan deməkdir. O, 1918-ci il mayın 28-də qurulmuş cümhuriyyətimizin banisi, milli ideoloqu olmaqla yanaşı, həm də filosof, sosioloq, politoloqdur. M.Ə. Rəsulzadə sadəcə bir dövlət başçısı, Müsavat Partiyasının başqanı deyil, eyni zamanda çar Rusiyasında baş qaldıran inqilablardan sonra Cənubi Qafqazdakı müsəlmanların, türklərin lideri, milli qurtuluş hərəkatının ideoloqudur. Onun əsas milli ideyası azərbaycançılıq olub. Bu Azərbaycan ideyası da yeni dövrün tələblərinə uyğun olaraq həm dövlət yaratmaqdır, həm millətin yenidən özünə qayıdışıdır. İki əsrə yaxın idi ki, quzey Azərbaycan türkləri dövlətçilikdən məhrum olmuşdu, Rəsulzadə onlara yenidən dövlətçiliyi geri qaytardı. Türk müsəlman dövlətinə məhz Azərbaycan adını verən də Rəsulzadə olub. O, yeni dövrdə türk dünyasında yeni tipli dövlət yaratdı və həmin dövlət həm keçmişi, həm bu günü, həm də gələcəyi özündə əks etdirirdi. Azərbaycan Cumhuriyyətinin keçmişində də türklüyümüz, çağdaşlığımız var idi və onları bu günə daşıdı. Eyni zamanda Azərbaycan ruhunu dirçəltdi. Yəni, bir sözlə, Rəsulzadə türk və çağdaş ruhlu bütöv Azərbaycan istəyirdi. Bu, bizim üçrəngli bayrağımızda da öz əksini tapıb. Rəsulzadənin ideyası təkcə nəzəriyyədə qalmadı, Azərbaycan Cümhuriyyətində gerçəkləşdi. Bu ideologiya bu gün də yaşayır və həmişə də yaşayacaq".
Qeyd edək ki, Məhəmməd Əmin Rəsulzadə 1955-ci il martın 6-da, 71 yaşında Ankarada dünyasını dəyişib və Cəbəci Əsri məzarlığında dəfn edilib.
"AYMEDİACOMPANY.AZ"
