Azərbaycan dövlətçilik ənənələrinin və Ümummilli Lider Heydər Əliyevin strateji idarəçilik fəlsəfəsinin təhlilinə həsr edilmiş “Azərbaycan Xalqının Dövlətçilik Fəlsəfəsi” adlı analitik məqalə Pakistan İslam Respublikasının bir sıra nüfuzlu media platformalarında dərc edilmişdir. Məqalə Islamabad Post, DNA News Agency, The Europe Today, The Gulf Observer, Margalla Tribune, Pakistan in the World kimi aparıcı informasiya resurslarında, həmçinin sosial media platformalarında geniş yayılmışdır.
Məqalənin müəllifi Fərid Mustafayev – YAP Yasamal rayon Elm və Təhsil Nazirliyinin Torpaqşünaslıq və Aqrokimya İnstitutu üzrə ərazi partiya təşkilatının sədr müavini, həmçinin Qərbi Azərbaycan İcmasının üzvü, Azərbaycan-Pakistan münasibətlərinin inkişafında bu informasiya əməkdaşlığının əhəmiyyətini vurğulayaraq bildirib: “Məqalənin Pakistanın aparıcı media strukturlarında dərc edilməsi Azərbaycan dövlətçiliyinin əsas ideoloji istiqamətlərinin beynəlxalq səviyyədə tanıdılmasına xidmət etməklə yanaşı, iki ölkə arasında strateji tərəfdaşlıq münasibətlərinin daha da möhkəmlənməsinə mühüm töhfə verir. Bu hadisə Azərbaycan və Pakistan arasında mövcud olan qardaşlıq, siyasi həmrəylik və qarşılıqlı dəstək prinsipinə əsaslanan əməkdaşlığın informasiya müstəvisində də yüksək dinamika ilə inkişaf etdiyini bir daha təsdiq edir.
