Azərbaycanlı elm adamlarından ibarət nümayəndə heyəti Özbəkistanda keçirilən I Qlobal Sağlamlıq və Biotibb Beynəlxalq Konfransında ölkəmizi layiqincə təmsil ediblər.

XARƏZM, Özbəkistan – Qardaşlıq qan bağlılığı, kökə qayıdış deməkdir. Turan elləri bir araya gələndə könüllər fərah olur. Azərbaycan türkləri ilə özbək türklərinin qan bağı birdir və bu ulu çinarın budaqları həmişə eyni günəşə boylanıb. Bu birliyin növbəti təzahürü fevralın 8-dən 11-dək Özbəkistanın Xarəzm vilayətində yaşanan elmi və mənəvi bayram oldu.
Səfər BZT Turan Akademiyası və Ürgənc Dövlət Tibb İnstitutunun rəsmi dəvəti ilə baş tutmuşdu. Səfər çərçivəsində 16 nəfərlik nümayəndə heyəti Ürgənc Dövlət Tibb İnstitutu, Ürgənc Dövlət Pedaqoji Universiteti və Mamun Universitetində keçirilən silsilə tədbirlərdə iştirak etdilər. Ulu babalarımızın ayaq izlərini daşıyan Xiva və Ürgənc kimi qədim şəhərlərin tarixi abidələri ilə tanışlıq isə nümayəndə heyətinə əsl kökə qayıdış sevincini yaşatdı.

Səfərin ana xəttini təşkil edən I Qlobal Sağlamlıq və Biotibb Beynəlxalq Konfransı Azərbaycan, Özbəkistan, Qazaxıstan, ABŞ, Türkiyə və Koreyadan olan elm adamlarını həm canlı, həm də onlayn platformada bir araya gətirdi. Xarəzmin soyuq qışında, ayazlı günəş altında keçən bu 4 gün zaman baxımından qısa olsa da, Türk dünyasının elmi inteqrasiyası baxımından tarixi bir əhəmiyyət kəsb etdi.
Konfransın açılışında çıxış edən Ürgənc Dövlət Universitetinin rektoru, professor Rəşid Ruzbayev Özbəkistan-Azərbaycan qardaşlığının təməllərinin möhkəmlənməsində ümummilli lider Heydər Əliyevin tarixi rolunu xüsusi vurğuladı. O, bu uzaqgörən siyasətin bu gün Azərbaycan Prezidenti tərəfindən uğurla davam etdirildiyini bildirdi.
Azərbaycan Tibb Universitetinin Urologiya kafedrasının müdiri, akademik Sudeyf İmamverdiyev öz nitqində qardaşlıq əlaqələrinin elmi müstəvidə daha da dərinləşməsinin vacibliyindən danışdı. Akademik gənc tələbələri elmə və biliyə məhəbbətlə yiyələnməyə səsləyərək, gələcək tibbin məhz savadlı gəncliyin çiyinlərində yüksələcəyini qeyd etdi.
Azərbaycan Milli Məclisinin deputatı Naqif Həmzəyev isə müasir dövrün ən aktual mövzularından olan süni intellektin tibbdə və elmdə tətbiqi məsələlərinə toxundu. Millət vəkili qloballaşan dünyada texnoloji tərəqqinin sürətlə vüsət almasına baxmayaraq, insan amilinin, həkim şəfqətinin və zəkasının hər zaman mərkəzdə qalacağını diqqətə çatdırdı.
Bu səfər təkcə tibb və biologiya elminin yeniliklərinin bölüşüldüyü bir platforma deyil, həm də qardaş xalqlar arasında sönməz bir dostluq körpüsünə çevrildi. Xarəzm torpağından ayrılan nümayəndə heyəti özü ilə həm böyük elmi təcrübə, həm də Turan birliyinin
istisini gətirdi
Tədbirdə Şəhid həkimlərin Xatirəsi Ehtiramla yad edildi
Konfransın açılış mərasiminin ən təsirli və duyğulu anları isə Azərbaycan Tibb Universitetinin Normal Fiziologiya kafedrasının müəllimi, biologiya üzrə fəlsəfə doktoru Mehri Seyidbəylinin müəllifi olduğu, bəstəkar Fərahim Sadiq tərəfindən musiqili kompozisiya şəklinə salınan "Şəhid həkimlər" videoçarxının nümayişi oldu.
Vətən uğrunda canından keçən ağ xalatlı qəhrəmanlarımıza həsr olunmuş bu videoçarx iştirakçıların sonsuz ehtiramı və böyük marağına səbəb oldu. Ekrandakı hər bir kadr və musiqinin həzin sədaları konfrans zalında dərin bir sükut və duyğu dolu anlar yaşatdı. Bu təqdimat bir daha sübut etdi ki, həkimlik peşəsi təkcə şəfa vermək deyil, həm də lazım gəldikdə Vətən yolunda fədakarlıq zirvəsinə ucalmaqdır.

Konfransın gedişatında Azərbaycan nümayəndə heyətinin üzvləri təbabətin ən aktual mövzuları ətrafında geniş məruzələrlə çıxış ediblər. ATU-nun Normal fiziologiya kafedrasının müəllimləri Mehri Seyidbəyli, Pərvin Zülfüqarova, Ülviyyə Cəfərova, Aysel Həşimova, Təcili yardım stansiyasının mütəxəssisləri Xatirə Şirinova-Səfərova, Nigar Cəfərova, Bakı International I klinikasının həkim-ginekoloqu Sürəyya Mirzəyeva, DSX Hərbi Hospitalın Doğum şöbəsinin ekstrakorporal müalicə üzrə mütəxəssisləri Yeganə Əliyeva, Yusufcan Bekçi, icraçı koordinator Nəhayət Əliyeva, Andromed Klinikasının rəhbəri, dermoandroloq Mirzəli Cəfərquliyev və Binəqədi 1 saylı TTTYS-nin həkim-terapevti Şəmsəddin Yusifov müasir tibbin yenilikləri barədə öz bilik və təcrübələrini beynəlxalq auditoriya ilə bölüşüblər.

Gözəl təəsüratla başa çatan səfərdə böyük zəhməti olan Özbəkistan, Urgənc Dövlət Tibb İnstitutunun rektoru Prof. Dr. Rəşid Ruzibayevə, Mamun Universitetinin rektoru dos. Bəhram Yoldaşova, Xorəzm vilayətinin Gənclər siyasəti və elm üzrə rəhbərinin müavini Prof. Dr. Sanatbek Kamiloviç Salayevə, Özbəkistan Pedaqoji Universitetinin rektoru prof. Firuzə Madraximovaya, həmçinin bu möhtəşəm elmi görüşün ərsəyə gəlməsində əməyi keçən bütün hörmətli heyət üzvlərinə ən səmimi təşəkkürlərimizi və dərin minnətdarlığımızı bildiririk.
Elmin dili sərhəd tanımır — lakin bu körpünü qurmaq üçün ürək, niyyət və zəhmət lazımdır. Bu zəhmətə sevə-sevə qatlaşan, konfransın və səfərin yüksək səviyyədə təşkilində, iki qardaş xalq arasında elmi və mənəvi bağların möhkəmləndirilməsində əsas rolu olan BZT Turan Akademiyasının rəhbəri, sosial elmlər üzrə fəlsəfə doktoru Fərahillə Babayeva-Şükürovaya dərin təşəkkürlərimizi bildiririk. Onun uzaqgörənliyi və təşkilatçılıq bacarığı bu əməkdaşlığı real və davamlı bir mərhələyə daşıdı.

Eyni zamanda, BZT Turan Akademiyasının Azərbaycan üzrə təmsilçisi Niyaməddin Şükürova və Türkiyə üzrə təmsilçisi Baha Ahmet Yılmaza göstərdikləri dəstək, koordinasiya və fədakar fəaliyyətlərinə görə xüsusi minnətdarlığımızı çatdıraraq belə səfərlərin davamlı olmasını diləyirik.

Konfransın işinin elmi təşkilatçılığından əlavə onun müəyyən və qısa zaman dilimində tərtibatında böyük zəhməti olan TQDK nın zal nəzarəti üzrə əməkdaşı Səbinə Abbas və Novella kitab evinin direktoru Xanım Mustafayeva işlə bağlı səfərə qatıla bilməsələr də qəlb döyüntüləri hər zaman heyət üzvlərinin qəlbində duyulub. Növbəti elmi görüşlərdə iştirak etməyi tək onlar deyil, bir çox peşə sahibləri də səbirsizliklə gözləməkdədir.

Bu görüş bir daha sübut etdi ki, Turan coğrafiyasında elm ortaq ruh, əməkdaşlıq isə ortaq gələcəkdir.
Dr.Mehri Seyidbəyli