Mart ayının 6-da Azərbaycan Dövlət Film Fondunda görkəmli kinoaktyor Gündüz Abbasovun anadan olmasının 95 illiyinə həsr olunmuş yubiley gecəsi təşkil olunub. Tədbir çərçivəsində sənətkarın həyat və yaradıcılığını əks etdirən fotosərginin açılışı olub.Tədbirdə bir sıra mədəniyyət və kino xadimləri, sənətsevərlər, həmçinin aktyorun dostları, ailə üzvlərindən oğlu İlqar Abbasov, nəvələri Şəmsəddin Abbasov, Mehrəli Bədirov, nəticəsi Gündüz Abbasov və s. iştirak ediblər.Tədbiri giriş sözu ilə Azərbaycan Film Fondunun direktoru, əməkdar incəsənət xadimi Cəmil Quliyev açaraq, aktyorun böyük Cəfər Cabbarlı nəslindən olduğunu və 12 yaşından filmlərə çəkildiyini, müxtəlif dövrlərdə idmançı kimi də fəaliyyət göstərdiyini qeyd edib. Gecədə Xalq artisti Xalidə Quliyeva, əməkdar artistlər Suğra Bağırzadə, Əliqulu Səmədov, gənclik illərinin dostu, Dağlıların ağsaqqal bildiyi Adil Sadıqov, Azərbaycan Milli Konservatoriyasının professoru, sənətşünasliq üzrə elmlər doktoru Abbasqulu Nəcəfzadə, dosent Firudin Qurbansoy Gündüz Abbasovla baglı xatirələrini bölüşərək həyat və yaradıcılığından bəhs ediblər. Onun həmçinin Azərbaycan kino sənətinin inkişafında mühüm rol oynadığını vurğulayaraq bildiriblər ki, sənətkar yaratdığı obrazlarla tamaşaçıların yaddaşında silinməz iz qoymuş, özünə məxsus aktyor üslubu ilə milli kinematoqrafiyada xüsusi yer tutmuş sənət nümayəndələrindən biri olub.
1930-cu ildə Bakıda Azərbaycan nasiri, dramaturq Azərbaycan Yazıçılar Birliyinin üzvü Şəmsəddin Abbasovun ailəsində anadan olan Gündüz Abbasov yaradıcılıq fəaliyyətinə gənc yaşlarından başlayıb. O, yalnız aktyor kimi deyil, həm də jurnalist və publisist kimi fəaliyyət göstərərək mətbuat sahəsində də öz töhfəsini verib. Uzun illər ərzində müxtəlif kino layihələrində iştirak edən sənətkar bir sıra bədii filmlərdə maraqlı və yaddaqalan obrazlar yaradıb.
Aktyorun çəkildiyi filmlər sırasında "Bir qalanın sirri", "Babək", "Dədə Qorqud", "Telefonçu qız", "İşarəni dənizdən gözləyin", "Onun boyuk ürəyi" və s. bu kimi yaddaqalan ekran əsərləri xüsusi yer tutur. Bundan əlavə, o, "Mozalan" satirik kinojurnalında çəkildiyi maraqlı epizodlarla da geniş tamaşaçı rəğbəti qazanıb. Aktyorun sonuncu ekran əsəri "Yuxu" filmi olub ki, bu film mərhum aktyorun vəfatından sonra işıq üzü görüb.
Tədbir çərçivəsində aktyorun həyat və yaradıcılıq yolunu əks etdirən videoçarx nümayiş olunub, onun çəkildiyi filmlərdən fraqmentlər təqdim edilib. Çıxış edənlər sənətkarın Azərbaycan kino tarixində özünəməxsus iz qoyduğunu və onun yaradıcılıq irsinin gələcək nəsillər üçün dəyərli məktəb olduğunu bildiriblər. Tədbirdə həmçinin, Azərbaycan Dövlət Mədəniyyət və İncəsənət Universitetinin dosenti, tarzən Cəbrayıl Göyüşov mərhum sənətkarın çox sevdiyi "Bayatı Şiraz" muğamını ifa edərək gecəyə xüsusi rəng qatıb.
Xatirə gecəsinin sonunda görkəmli sənətkarın xatirəsi ehtiramla yad olunub və onun Azərbaycan mədəniyyətinə verdiyi töhfələr bir daha vurğulanıb.Tədbirdə rejissor Əmirhüseyn Məcidovun arxivindən sənətkarın nadir görüntüləri nümayiş etdirilib. Sonda Gündüz Abbasovun ailə üzvləri adından nəvəsi CBC sport telekanalının idman xəbərlərinin baş redaktoru, şərhçi Şəmsəddin Abbasov çıxış edərək, tədbirin təşkilində əməyi olan hər kəsə təşəkkürünü bildirib. Xatirə fotoları çəkilib.
Nigar Rzayeva
"AYMEDİACOMPANY.AZ"
