Azərbaycan Respublikasının Mədəniyyət Nazirliyinin tabeliyində fəaliyyət göstərən Mədəniyyət üzrə Elmi-Metodiki və İxtisasartırma Mərkəzi tərəfindən orta ixtisas musiqi məktəbləri üçün muğam xanəndəlik proqramlarının təkmilləşdirilməsi məqsədilə geniş tərkibli konfrans təşkil olunub.
Konfransda sahə üzrə tanınmış mütəxəssislər, pedaqoqlar və ifaçılar iştirak edib. Tədbirə "AYMEDİACOMPANY.AZ"-ın Mədəniyyət İşləri üzrə direktor müavini Fərid Əmiraslanov da ekspert qismində dəvət olunub. Qeyd edək ki, Fərid Əmiraslanov 15 ildən artıq pedaqoji təcrübəyə malikdir və hazırda musiqi məktəblərində xanəndəlik ixtisası üzrə müəllim kimi fəaliyyət göstərir.
Konfrans çərçivəsində iki fərqli muğam xanəndəlik tədris proqramı təqdim edilib. Proqramlardan biri qaval ifaçısı Mahmud Salahov tərəfindən, digəri isə Azərbaycan Respublikasının əməkdar müəllimi, tanınmış xanəndə Qəzənfər Abbasov, pedaqoq qəzəlxan və xanəndə-müəllim Səlim Nəsirli tərəfindən hazırlanaraq iştirakçılara nümayiş olunub.
Təqdim edilən proqramlar ekspertlər tərəfindən ümumilikdə müsbət qiymətləndirilsə də, yanaşmalarda fərqli mövqelər ortaya çıxıb. Belə ki, iştirakçıların bir qismi Mahmud Salahovun təqdim etdiyi proqramı daha məqsədəuyğun hesab edib, digər qismi isə Qəzənfər Abbasov və Səlim Nəsirlinin hazırladığı proqramı üstün tutub. Bununla yanaşı, bəzi ekspertlər hər iki proqramın müsbət tərəflərinin birləşdirilərək vahid tədris modelinin hazırlanmasını daha məqsədəuyğun hesab etdiklərini bildiriblər.
Müzakirələr zamanı proqramların metodiki əsasları, tədris ardıcıllığı və praktik tətbiq imkanları geniş şəkildə təhlil olunub. Təklif və rəylər nəzərə alınaraq proqramın daha da təkmilləşdirilməsi istiqamətində işlərin davam etdirilməsi qərara alınıb.
Bildirilib ki, məsələ ilə bağlı əlavə iclas və konfransların keçirilməsi planlaşdırılır. Yekun proqram Azərbaycan Respublikasının Mədəniyyət Nazirliyi tərəfindən təsdiq edildikdən sonra ictimaiyyətə geniş məlumat veriləcək.
AYMEDİACOMPANY.AZ"
