Bu gün Bakı şəhərində yerləşən Nizami Kino Mərkəzində Azərbaycanın Milli Qəhrəmanı, şəhid Natiq Qasımovun həyat və qəhrəmanlığına həsr olunmuş “Düşmənə Qarşı Tək” filminin xüsusi təqdimat gecəsi baş tutub.

Süni intellekt texnologiyalarının dəstəyi ilə ərsəyə gətirilən ekran əsərinin təqdimatında şəhidin ailə üzvləri, dövlət və media nümayəndələri iştirak ediblər. Qonaqlar arasında Natiq Qasımovun döyüş yoldaşı Ala Yaqub ləqəbli Yaqub Rzayevin qızı da yer alıb.
Tədbirin aparıcısı Əməkdar artist, filmin layihə rəhbəri Dilarə Əliyeva olub. Təqdimat mərasimi Azərbaycan Respublikasının Dövlət Himninin səsləndirilməsi ilə başlayıb.
Daha sonra filmin direktoru Fariz Əliyev və layihədə istifadə olunan süni intellekt texnologiyasının müəllifi Sarvan Hüseyn çıxış edərək filmin ərsəyə gəlmə prosesindən, layihənin məqsədindən və gənc nəslin vətənpərvərlik ruhunda tərbiyəsində bu cür ekran əsərlərinin əhəmiyyətindən danışıblar.
Çıxışlardan sonra “Düşmənə Qarşı Tək” filmi nümayiş olunub. Tamaşaçılar ekran əsərini böyük maraqla izləyib, filmdə Milli Qəhrəman Natiq Qasımovun döyüş yolu və göstərdiyi misilsiz şücaət əks olunub.
Tədbirin sonunda şəhidin qardaşı Nofəl Qasımov çıxış edərək filmin hazırlanmasında əməyi olan hər kəsə, eləcə də təqdimat gecəsində iştirak edən qonaqlara minnətdarlığını bildirib.
Qeyd edək ki, “Düşmənə Qarşı Tək” filmi Azərbaycanın Milli Qəhrəmanı Natiq Qasımovun əziz xatirəsinin yaşadılması, onun qəhrəmanlıq salnaməsinin gələcək nəsillərə çatdırılması məqsədilə hazırlanıb.

Nigar Rzayeva
"AYMEDİACOMPANY.AZ"