Çorum Bələdiyyəsi tərəfindən 38-ci Beynəlxalq Çorum Hitit Festivalı çərçivəsində bu il Turkiyədən ümumilikdə 34 sənətkar olmaqla yanasi bir cox fərqli olkələrdən: Azərbaycan, Bolqarıstan, Bosniya və Herseqovina, Özbəkistan, İran və digər ölkələrin sənətkarları da festivala qatılmışdır. Bir həftə ərzində Çorumun tarixi və təbii gözəlliklərini yerindəcə araşdıran sənətçilər təəssüratlarını kətanlarına köçürərək şəhərin mədəni və sənət yaddaşına qalıcı əsərlər qazandırmışlar.
Yaradıcılıq emalatxanasında ölkəmizi ləyaqətlə və yüksək peşəkarlıqla təmsil edən Azərbaycan rəssamları Turac Seyidbəyli və əslən Ərdəbildən olan musiqiçi-rəssam-heykəltaraş Vedud Muazzen milli sənətimizin zənginliyini və rəngarəngliyini beynəlxalq müstəvidə bir daha nümayiş etdiriblər. Onların kətan üzərinə köçürdükləri dərin məzmunlu əsərlər, milli boyalar və ecazkar fırça işləri həm yerli sakinlərin, həm də xarici qonaqların böyük marağına və heyranlığına səbəb olub. Azərbaycan rəssamlarının bu mötəbər tədbirdəki uğurlu iştirakı ölkəmizin mədəniyyət və incəsənət potensialını tanıdaraq, xalqlarımız arasında dostluq və qardaşlıq körpülərini daha da möhkəmləndirib.
Çorumun mədəniyyət və incəsənət həyatına mühüm töhfələr verən, festivalın kuratoru, dəyərli pedaqoq-rəssam Bünyamin Ağbal, əbru sənətinin ustadı Nilqün Ayşəcik Çevik tədbirin açılışındakı çıxışlarında qardaş Azərbaycandan ikinci dəfə yaradıcılıq emalatxanasına dəvət olunan rəssamlarımızın timsalında qardaşlığın sənətdə də biruzə verdiyini vurğulamışlar.
Eyni zamanda rəssam Turac Seyidbəyli və Vedud Muazzen çıxış nitqlərində Türkiyə və Azərbaycan qardaşlığının sənət və mədəniyyət müstəvisində əbədi və sarsılmaz olduğunu vurğulayaraq, ortaq mənəvi dəyərlərimizin hər zaman bir amal uğrunda birləşdiyini qeyd ediblər.
Yaradıcılıq emalatxanasının sonunda meydana çıxan əsərlər Çorum Bələdiyyəsi İncəsənət Muzeyi və Qalereyasının inventarına daxil edilərək qeydiyyata alınmış və daimi olaraq sərgilənərək Çorumun mədəni irsinə qalıcı bir dəyər kimi gələcək nəsillərə ötürüləcəkdir.
Bu il yaradıcılıq emalatxanasının diqqət çəkən yeniliklərindən biri də Çorumlu sənətkarların ikinci dəfə beynəlxalq dəvətli sənətkarlarla birlikdə tədbirə qatılması olub.
Yaradıcılıq emalatxanası müddətində sənətçilər yaradıcılıq işlərini vətəndaşların ziyarətinə açıq şəkildə davam etdirmişlər. Sənətə könül verən çoxsaylı ziyarətçi sənətkarların yaradıcılıq proseslərini yaxından izləmək fürsəti əldə edərkən, fərqli ölkələrdən gələn qonaq sənətkarlarla sənət barəsində həmsöhbət olmuşlar.
Qonaq sənətkarlar Çorumun zəngin tarixi irsi, təbii gözəllikləri, qonaqpərvərliyi və mədəni ab-havasından duyduqları məmnuniyyəti dilə gətirərkən, şəhərin onlara ilham verdiyini və burada olmaqdan böyük xoşbəxtlik duyduqlarını ifadə etmişlər.
İncəsənətin universal dili ilə fərqli mədəniyyətləri Çorumda bir araya gətirən VIII Beynəlxalq İncəsənət Yaradıcılıq emalatxanası şəhərin beynəlxalq mədəniyyət və sənət kimliyinə töhfə verərkən, dostluq və qardaşlıq bağlarını da sənət vasitəsilə gücləndirməyə vəsilə olmuşdur.
"AYMEDİACOMPANY.AZ"
