Şəhid Ələkbərov Naiq Faiq oğlunun oğlu Ələkbərli Ömərin böyük arzularından biri gerçəkləşib.
“Qarabağ” futbol klubuna və komandanın baş məşqçisi Qurban Qurbanova xüsusi sevgisi olan Ömər məşhur məşqçi ilə görüşmək arzusunda idi. Bu arzu avqustun 13-də “Qarabağ” və “Dinamo Kiyev” arasında keçirilən qarşılaşma zamanı gerçəkləşib.
Görüşün reallaşmasında “Qarabağ” FK-nın mətbuat katibi Anar Hacıyev və akademiya meneceri Uğur Təhməzov xüsusi təşəbbüs göstəriblər. Onların dəstəyi ilə Ömərin “Qarabağ” futbolçularının əlindən tutaraq meydana daxil olması üçün şərait yaradılıb.
Ömər üçün gecənin ən həyəcanlı və unudulmaz anı isə Qurban Qurbanovla görüşü olub. Qurban Qurbanov balaca Öməri səmimiyyətlə qarşılayıb, onun başını sığallayaraq könlünü alıb. Sevdiyi məşqçi ilə üz-üzə gələn Ömərin yaşadığı sevinc və həyəcan onun üzündəki təbəssümdən aydın hiss olunub.
Qarşılaşmanın özü də əsl futbol bayramına çevrilib. Stadionda təxminən 23 min azarkeşin iştirakı ilə keçirilən oyun böyük coşqu və yüksək əhval-ruhiyyə ilə yadda qalıb.
Meydanda isə “Qarabağ” öz sözünü deyib. Azərbaycan təmsilçisi Kiyev “Dinamo”sunu 2:0 hesabı ilə məğlub edib. “Qarabağ”ın iki cavabsız qolu azarkeşlərin sevincini daha da artırıb və arenada böyük coşqu yaşanıb.
Lakin həmin gün Ömər üçün ən böyük qələbə yalnız hesab tablosundakı 2:0 olmayıb. Onun üçün əsl qələbə sevdiyi “Qarabağ”ın futbolçuları ilə birlikdə meydana çıxmaq, minlərlə azarkeşin qarşısında olmaq və ən böyük arzularından biri – Qurban Qurbanovla görüşmək olub.
Şəhid övladının arzusunun həyata keçirilməsi həm də cəmiyyətimizdə uşaqlara, xüsusilə şəhid ailələrinin övladlarına göstərilən diqqət və qayğının gözəl nümunəsidir. Bəzən bir uşağın arzusunu gerçəkləşdirmək onun yaddaşında ömürlük xoşbəxt bir xatirə yaradır.
Ömərin həmin gün yaşadığı sevinc, həyəcan və xoşbəxtlik isə uzun müddət yaddaşlardan silinməyəcək. “Qarabağ”ın 2:0 hesablı qələbəsi, minlərlə azarkeşin coşqusu və Qurban Qurbanovla görüş – bütün bunlar Ömər üçün həyatının ən unudulmaz günlərindən birinə çevrilib.
Bu gözəl anların yaşanmasına səbəb olan hər kəsə təşəkkürümüzü bildiririk. Xüsusilə “Qarabağ” futbol klubunun rəhbərliyinə, mətbuat katibi Anar Hacıyevə, akademiya meneceri Uğur Təhməzova minnətdarıq.
Onlar bir şəhid övladının arzusunu gerçəkləşdirməklə yanaşı, onun qəlbinə böyük sevinc bəxş etdilər. Ömərin sevincini, həyəcanını görmək bu diqqətin nə qədər dəyərli olduğunu bir daha göstərdi.
Sağ olsunlar ki, şəhid övladının könlünü aldılar, onun ən böyük arzularından birini gerçəkləşdirdilər. Bu gözəl münasibət və diqqət heç vaxt unudulmayacaq. Allah hər birindən razı olsun.
Nigar Rzayeva
"AYMEDİACOMPANY.AZ"
