Növbəti tədbir Yasamal rayon 20 nömrəli məktəb-liseyində təşkil olunub. Tədbir 8 Noyabr – Zəfər Günü və “Mədəni irs: dünən və bu gün” layihəsi çərçivəsində keçirilib.Məktəb-liseyin daxilində fəaliyyət göstərən Heydər Əliyev muzeyində təşkil olunan tədbirdə əvvəlcə iştirakçılar muzeydəki sərgi ilə tanış olublar.Tədbirdə kompleksin əməkdaşları, tarix üzrə fəlsəfə doktoru, dosent Sübhan Talıblı, Abutalib Turabov və Xəyal Nuhbalayev, AMEA Fəlsəfə və Sosiologiya İnstitutunun baş mütəxəssisi Asya Əhmədova, habelə məktəb-liseyin direktoru, müəllim və şagirdləri iştirak ediblər.Məktəbin direktoru Yasəmən Əliyeva çıxış edərək qonaqlara təşəkkürünü bildirib, belə tədbirlərin şagirdlərin vətənpərvərlik ruhunda tərbiyəsində, tarixi yaddaşın qorunmasında mühüm əhəmiyyət daşıdığını vurğulayıb. Tarix üzrə fəlsəfə doktoru, dosent Sübhan Talıblı çıxışında 8 Noyabr – Zəfər Günü haqqında məlumat verib, Vətən müharibəsinin tarixi əhəmiyyətindən, Azərbaycan Ordusunun qəhrəmanlığından və Ali Baş Komandanın rəhbərliyi ilə əldə olunan Qələbədən danışıb. O, gənc nəslin bu tarixi bilməsinin və qiymətləndirməsinin vacibliyini qeyd edib. Abutalib Turabov soyqırımı və erməni təcavüzünün xalqımıza vurduğu ağır nəticələrdən bəhs edib, tarixi faktların gələcək nəsillərə düzgün çatdırılmasının önəmini diqqətə çatdırıb.Xəyal Nuhbalayev şagirdlərə Soyqırımı Memorial Kompleksinin fəaliyyəti, apardığı maarifləndirmə işləri və layihələr barədə məlumat verib.AMEA Fəlsəfə və Sosiologiya İnstitutunun baş mütəxəssisi Asya Əhmədova mədəni irsin qorunmasından, işğal dövründə mədəni və tarixi abidələrimizə vurulan ziyandan, onların bərpasının əhəmiyyətindən danışıb.
Tədbirdə şagirdlər də Vətən, Zəfər və şəhidlər mövzusunda çıxışlar ediblər.Tədbirdə ümumilikdə 70 nəfər iştirak edib, günboyu nümayiş olunan sərgiyə isə mindən çox insan baxış keçirib.
"AYMEDİACOMPANY.AZ"
