06-07 noyabr 2026-cı il tarixlərində Özbəkistanın Kokand şəhərində “Modern İpək yolu üzərində Türk dövlətlərinin siyasi və iqtisadi inteqrasiya prosesləri: çağırışlar və perspektivlər” mövzusunda Beynəlxalq elmi konfrans keçirilib. AMEA Fəlsəfə və Sosiologiya İnstitututunun təşəbbüsü və Azərbaycam Memarlıq və İnşaat Universitetinin iştirakı və dəstəyi ilə ötən ilin noyabrında Bakıda, daha sonra Ərzurumda Türkiyənin Atatürk Universitetinin və Özbəkistanın Kokand Universitetinin elmi əməkdaşlarının iştirakı ilə ikinci konfrans keçirilib. Bu elmi əlaqələrin davamı olaraq Özbəkistanın Kokand şəhərinin Kokand Universitetində təşkil edilən sayca üçüncü beynəlxalq elmi konfransda iştirak edən Azərbaycan, Türkiyə, Özbəkistan, Qazaxıstan və digər Türk dövlətlərinin tədqiqatçılarının, alimlərinin maraqlı elmi məruzələri dinlənilib.
Konfransda Azərbaycandan AMEA Fəlsəfə və Sosiologiya İnstitutunun elmi işlər üzrə direktor müavini Eynulla Mədətli, İnstitutun ümumi işlər üzrə direktor müavini Qabil Camalov, Türk xalqlarının ictimai fikir tarixi və müasir fəlsəfəsi şöbəsinin müdiri Faiq Ələkbərli və Azərbaycan Memarlıq və İnşaat Universitetinin əməkdaşları iştirak ediblər.
“Yeni Dünya nizamında Türk Dövlətləri Təşkilatı və türkçülüyün fəlsəfi -dünyəvi mahiyyəti” mövzusunda məruzə edən dosent Faiq Ələkbərli bildirib ki, XX yüzilin sonuna doğru müstəqil Türk dövlətlərinin sayının birdən (Türkiyə) altıya (Azərbaycan, Qazaxıstan, Qırğızıstan, Türkmənistan, Özbəkistan) qədər yüksəlməsi, üstəlik digər yarımmüstəqil Türk dövlətlərinin (Tatarıstan, Başqırdıstan, Saxa, Uyğurustan və b.) də istqilal uğrunda mücadiləyə davam etmələri yeni bir mərhələnin başlanğıcı olmuşdur. Özəlliklə, Sovetlər birliyinin dağılması ilə birdən birə beş müstəqil Türk dövlətinin meydana çıxması yalnız Rusiya Federasiyasını, İran İslam Respublikasını deyil, bəzi Qərb dövlətlərini də ciddi şəkildə narahat etmişdir. Hazırda Türk birliyinin gerçəkləşməməsi üçün antitütürk dairələr “Avrasiyaçılıq”, Qərb demokratiyası və digər ideyalar adı altında Türk dövlətlərində müxtəlif oyunlar oynamağa davam edirlər. Milli şüurun formalaşması prosesinin ləngiməsi fonunda, buna alternativ olaraq Türk xalqlarında yad ideyalar və ona uyğun qeyri-milli şüur formaları toplumun ayrı-ayrı təbəqələrinə bu və ya digər dərəcədə təsir göstərir.
